İKT TƏHSİL

Məlumat verdiyimiz kimi, Gəncə şəhər sakini Elçin Qasımov Tələbə Qəbulu üzrə Dövlət Komissiyasının (TQDK)  II və III ixtisas qrupları üzrə keçirdiyi imtahanda maksimum nəticə göstərərək 700 bal toplayıb.

Elçinin bacısı Gülçin də II ixtisas qrupu üzrə imtahan verib. Gülçin Qasımova da qəbul imtahanında 685  bal toplayaraq yüksək nəticə göstərənlərin siyahısına daxil olub.

Xeberler.az-ın Qasımovlar ailəsindən əldə etdiyi məlumata görə, abituriyentlərin yüksək bal toplamasından İKT-nin böyük rolu olub. Öyrənirik ki, İnternet eləcə də sosial media məlumatları  onlara yüksək bal toplamaqda  yardım edib.

Elçin Qasımovla müsahibəni təqdim edirik:

-Elçin, Universitetə hazırlaşdığınız vaxt  İnternetə daxil olma imkanınız necə idi?

- İnternetsiz  geniş  informasiyalar əldə etmək çətindir.  Məktəbdə dərs  prosesində   müəyyən  informasiyalar  əldə  etmək  üçün bacımla birlikdə İnternetdən faydalı  şəkildə istifadə  edirdik. 

-Əsasən hansı saytlardan istifadə edirdiniz?

-Məktəbdə bizə tədris olunan fənlərə uyğun olaraq həmişə informasiya əldə etmək lazım gəlirdi. Və bu zaman bu informasiyaları toplamaq üçün İnternetə üz tuturduq. Bizə  lazım  olan  informasiyaları  əldə  edə  biləcəyimiz  saytları diqqətdə saxlayırdıq.  Adətən təhsil  yönümlü saytlardan faydalanırdıq. Təbii ki, Google-dən mütəmadi istifadə edirdik.

-Sosial şəbəkələrdən istifadə etməyə imkan olurdumu? ( Facebook, Twitter, Instagram və s.)

-Baxmayaraq ki, İnternet bizim üçün önəmli informasiya mənbəyi idi, bəzən bu mənbədən uzaq da qala bilirdik. Bacımla Universitetə hazırlaşdığımız ərəfədə sosial  şəbəkələrdən  az  istifadə  etməyə çalışırdıq. Elə günlər olurdu ki, sosial şəbəkələrə daxil olmurduq. Qəbul imtahanından sonra  isə sosial şəbəkələrdən aktiv istifadə edirəm.

 -Gündə neçə saat İnternetdə olurdunuz?

-Bizə tapşırılan mövzuları oxuyub öyrənmək üçün bəzən İnternetdən uzaq qalırdıq. Amma bir abituriyent üçün İnternetdən hazırlaşdığı fənlərə dair məlumatlar əldə etmək çox asandır. Təxmini hesablasaq,  gün ərzində  30-45 dəqiqə İnternetdə olurduq. İnternetimizin sürəti elə də yüksək deyil.  Qeyd edim ki , mobil İnternetdən elə də çox istifadə etmirəm.

-Valideynləriniz sizin  İnternetdən istifadə etməyinizə hansısa qadağalar  qoyurdumu?

- Bu barədə bəxtimiz gətirib . Əksər abituriyentlərin valideynləri ali məktəbə hazırlaşan övladlarına kompüterlə, İnternetlə bağlı qadağalar tətbiq edir. Amma bizim valideyinlərimiz  demokratikdir və bu sarıdan heç vaxt əziyyət çəkməmişik(gülür).
Ümumiyyətlə, valideynlərimiz heç bir məsələ ilə bağlı bizə qadağalar tətbiq etməyiblər. Bəlkə də, yüksək nəticə göstərməyimizin səbəblərindən biri də budur.

- Maraqldır ki, İnternet materialları bu uğurunuzda sizə necə kömək etdi?

-Təbii ki,  İnternet  böyük bir  məlumat  bazasıdır. Deyərdim ki, yüksək   bal toplayan hər bir tələbə  İnternet materiallarından səmərəli istifadə edib. Bizə də İnternet bu istiqamətdə kömək etdi. Elektron məlumatlardan faydalanmaq yüksək bal toplamağımız üçün əlavə köməkçi vasitə oldu.

-Abituriyentlərlə bağlı sual -cavab qruplarında və ya digər bu kimi onlayn  qruplardan yararlanırdınızmı?

- Facebook qruplarında sual-cavab şəklində qoyulan mövzuları diqqətdə saxlayırdıq. Amma buna o qədər də vaxt sərf etmirdik.

-Xaricdə yoxsa, Azərbaycanda oxumağa üstünlük verirsiniz?

-Xaricdə təhsil ilə bağlı Dövlət proqramını qazana bilsəm, xaricdə təhsil almağı düşünürəm. Mümkün olmasa, ölkəmizdə təhsilimi davam etdirəcəm. 

İmtahanın nəticəsini İnternetdən öyrədiniz, yoxsa SMS-lə?

-Bacımla imtahan nəticələrini Tələbə Qəbulu üzrə Dövlət Komissiyasının rəsmi İnternet səhifəsindən öyrəndik.

-Yüksək bal toplamaq üçün abituriyentlərə nə məsləhət görərdiniz?

-Məsləhət görərdim ki, dərslərə lap aşağı siniflərdən həvəslə, məsuliyyətlə, diqqətlə yanaşsınlar. Əks halda bu uğuru qazanmaq  mümkün deyil.

-Hansı ixtisasıda təhsil almaq istəyirsiniz?

-“Mühasibat uçotu və audit”.

-Texnologiyalarla işləməyə  marağınız varmı? Gələcəkdə  İT sahəsi ilə məşğul olmaq istərdinizmi?

-Əlbəttə, İT sahəsinə çox həvəsim var. Təhsil aldığım vaxtlarda bu sahə ilə yaxından  maraqlanacam. İKT sahəsində bilikli olmaq zamanın tələbidir.

Məltəm Talıbzadə