AZNET

Bloger Adnan Hacızadə Amerikanın Səsi radiosuna müsahibə verib. O, müsahibədə bir çox məsələlərə aydınlıq gətirib.

- Adnan bəy, siz həm də video bloqçusunuz. Azərbaycanda bloqçuluq sahəsində vəziyyət necədir?  Sizin həbsinizdən sonra bu sahədə bir canlanma hiss edilirdi.

- Bəli, bizim həbsimiz bloqçuluğa təkan verdi. Hazırda sosial şəbəkələr insanlar üçün elə asan iş rejimi yaradıb ki, artıq bloqlara o qədər də ehtiyac hiss edilmir. Facebook və Twitter şəbəkəsində səhifən varsa bloqçu sayıla bilərsən.

- İndi dünyada inqilabçı sosial şəbəkələr şüarları səslənməkdədir. Azərbaycanda sosial şəbəkələrin etiraz aksiyalarında, hökumətin fəaliyyətinə təsirdə rolunu necə görürsünüz?

- Twitteri yaradan insan zarafatla deyib ki, bu şəbəkəni yaradanda onun hansısa  təsiri olacağını ümumiyyətlə düşünməyib. Sosial şəbəkələr bir alətdir, o aləti istifadə edən insanlar lazımdır. Sırf sosial şəbəkə ilə heç nəyə, heç bir dəyişikliyə nail olmaq olmaz. Dəyişikliyi həyata keçirən insanlar lazımdır. Hələ ki, Azərbaycanda sosial şəbəkələrdən real etirazın doğuşunu görmürəm. Bu, bir sıra faktorlarla bağlıdır. Azərbaycanda internet istifadəçilərinin sayı artdıqdan, internetin sürəti artırıldıqdan, qiymətləri endirildikdən sonra bu, real görünə bilər. Xüsusi ilə, dəyişikliklər üçün insanlar lazımdır.

İnqilablar, dəyişikliklər tarixdə həmişə baş verib. Bunlar baş verən zaman nəinki sosial şəbəkələr, heç internet yox idi. 1980-ci illər inqilablarında milyonlarla insanlar iştirak edib. Eyni zamanda Avropanı və dünyanı bürüyən inqilabı hərəkətlər zamanı milyonlarla insan iştirak edib.