Azərbaycanda Milli Telekommunikasiya Şurası yaradılacaq

30-12-2016 / 13:19

Məlumat verdiyimiz kimi, bu gün Telekommunikasiya və informasiya texnologiyalarının inkişafına dair Strateji Yol Xəritəsi açıqlanıb.

Xəritədə ölkədə İKT-nin inkişafı ilə bağlı bəzi ciddi məqamlar yer alıb.

Görəsən, bu proqramda konkret nələr nəzərdə tutulub?. Müsbətə doğru hansı işlər həyata keçiriləcək?

Bunlarla bağlı Azərbaycan İnternet Forumunun prezidenti Osman Gündüzlə söhbət etdik.

Osman Gündüz bildirib ki, Azərbaycanda İKT-nin inkişafına dair Strateji Yol Xəritəsində ekspertlər  tərəfindən verilən çoxsaylı Təkliflərin bir hissəsi öz əksini tapıb.

Onun sözlərinə görə, Yol Xəritəsində bu sektorda situasiyanı kəskin dəyişəcək təkliflər də yer alıb.

"Sənəddə artıq konkret qeyd edilib ki, yaxın 3 il ərzində Müstəqli Tənzimləyici qurum – Milli Telekommunikasiya Şurası yaradılacaq. Qeyd edim ki, bu istiqamətdə 10 ildən çoxdur müzakirələr davam edirdi. Amma bu günə qədər bu iş nədənsə ləngiyirdi. Nəhayət ki, qurumun yaradılması üçün artıq konkret vaxt qoyulub. Belə ki, Şura 3 il ərzində yaardılmalıdır. İKT sektorundakı bütün tənzimləmələr, lisenziyaların verilməsi, istehlakçıların mənafelərinin qorunması, bazarda qayda-qanun yaradılması , tariflər və bütün bu kimi məsələləri bu qurum həll edəcək. Şuranın rəhbəri və üzvləri Prezident tərəfindən müəyyən olunacaq. Gələn ildən artıq bu qurumun yaradılması üçün İşçi Qrup formalaşdırılacaq. Məsul icraçı qurum da Prezident Administrasiyasıdır. Elə təkcə bu bəndin reallaşması İKT mühitində çox şeyi dəyişəcək".

Osman Gündüz bu sahədə gözənilən ciddi dəyişiklikləri qeyd edib.

O, vurğulayıb ki, ilk növbədə Aztelekom MMC, Bakı Telefon Rabitəsi İstehsalat Birliyi və AzİnTelecom MMC kimi nəhəng qurumlar özəlləşdirilməyə çıxarılacaq. Bundan başqa, uzun illər müzakirə mövzusu olan TASİM –in Xəzər dənizinin altından keçən hissəsi güman ki, öz həllini tapacaq".

Osman Gündüz qeyd edib ki, daha bir backbone operatorun yaradılması nəzərdə tutulub (hazırda 2 provayder var):

"Hazırda hər istifadəçiyə düşən orta 3.6 Mbit/s sürət 2020-də 20 Mbit/s çatdırılacaq . Ölkə üzrə nəhəng fiber-optik və mobil genişzolaqlı (LTE) şəbəkə yaradılacaq”.

Osman Gündüzün sözlərinə görə, biznes subyektlərinin rəqəmsal mühitə keçidi üçün “rəqəmsal keçid planı” hazırlanacaq, rəqəmsal ödənişlər genişləndiriləcək:

“Ölkədə texnologiya üzrə təhsil səviyyəsinin artırılması, təhsil standartlarının təkmilləşdirilməsi, İKT sektorunda kadr potensialını gücləndirilməsi üçün “Texnoloji Təhsil Qrupu” yaradılacaq.Dövlət orqanların informasiya sistemləri üçün mərkəzləşdrilmiş infrastruktur yaradılacaq. Güman ki, bu, yeni yaradılan Data Mərkəz nəzərdə tutulub. Bundan əlavə,  Mobil Gov üzrə konsepsiya yaradılacaq. Dövlət qurumları arasındakı kağız vasitəsilə əlaqələr 2018-də tam elektrona keçəcək”.

Ekspert vurğulayıb ki, müəyyən edilmiş strateji hədəflərə nail olmaq üçün 585 milyon manat investisiya tələb olunur.

Məltəm Talıbzadə

 


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə