TEXNOLOGİYA

“Dünyada İKT üzrə ən qabaqcıl biliklərin əldə olunması və cəmiyyətə ötürülməsi institutun əsas hədəflərindəndir”.

Xeberler.az-ın məlumatına görə, bu fikirləri AMEA-nın akademik-katibi, İnformasiya Texnologiyaları İnstitutunun direktoru, akademik Rasim Əliquliyev Elmi Şuranın iclasında çıxışı zamanı səsləndirib.

Alim rəhbərlik etdiyi qurumun fəaliyyət istiqamətlərinin günü-gündən genişləndiyini, prioritet elmi istiqamətlərdə araşdırmaların aparıldığını qeyd edib.

“Dünyada İKT üzrə ən qabaqcıl biliklərin əldə olunması və cəmiyyətə ötürülməsi institutun əsas hədəflərindəndir”, – deyə bildirən alim bu məqsədlə elmə həvəsi olan gənc kadrların quruma cəlb olunmasının vacib məsələlərdən olduğunu deyib.  

R.Əliquliyev institutun fəaliyyəti – burada həyata keçirilən innovativ layihələr və əldə olunan mühüm elmi nəticələrin kütləvi informasiya vasitələrində təbliğinin zəruriliyini vurğulayıb. Eyni zamanda institut əməkdaşlarını İKT sahəsində keçirilən ölkədaxili və beynəlxalq konfranslarda, seminar və treyninqlərdə fəal iştirak etməyə, öz biliklərini ictimaiyyətlə bölüşməyə çağırıb.

Alim son zamanlarda elm sahəsində plagiatlıqla bağlı ciddi problemlərin mövcud olduğunu qeyd edərək, bu kimi halların qarşısının alınması, elmi tədqiqatların beynəlxalq tələblərə uyğun və şəffaf şəkildə aparılması məqsədilə mühüm tədbirlərin görüldüyünü diqqətə çatdırıb. Bildirib ki, “Elm haqqında” Qanunda da plagiat və piratçılıqla mübarizə məsələlərinə xüsusi diqqət yetirilmişdir.

İKT üzrə yeni elmi istiqamətlərin hər zaman institutun diqqət mərkəzində olduğunu vurğulayan akademik proqram mühəndisliyi sahəsində beynəlxalq təcrübənin öyrənilməsi və yüksəkixtisaslı kadrların hazırlanması ilə bağlı tövsiyyələrini səsləndirib.

R.Əliquliyev, həmçinin elmi araşdırmaların səmərəli şəkildə aparılması və mühüm nəticələrin əldə olunması üçün müasir dövrün ən böyük tələblərindən olan ingilis dilini öyrənməyin önəmini xüsusi qeyd edib. Bu məqsədlə institutda dil kurslarının təşkili və əməkdaşların bu kurslarda fəal iştirakının vacibliyini önə çəkib.

 Məltəm Talıbzadə