Goranboyda torpaqların elektron kadastr işlərinə start verilib

30-07-2018 / 14:38

Goranboy rayonunda torpaqların elektron kadastr işlərinə başlanılıb.

Xeberler.az məlumat verir ki, ölkədə elektron kadastr uçotu işlərinin aparılması ilə dəqiqləşmiş torpaq sahibliyi müəyyən ediləcək, hər bir vətəndaşa, eləcə də bələdiyyələrə, dövlətə məxsus olan torpaqların sərhədləri birmənalı məlum olacaq. “Bununla bütün növ torpaq sahələrinin hüquqi sənədlərdəki ərazi göstəriciləri ilə faktiki istifadə olunan ərazi göstəriciləri arasındakı uyğunsuzluqlar aradan qalxacaq. Heç kəs sahib olduğu torpaqdan əlavə ərazini zəbt edə bilməyəcək, dövlət nəzarəti təkmilləşdirilmiş formada həyata keçiriləcək. Bütün bunlar Əmlak Məsələləri Dövlət Komitəsi tərəfindən yaradılan Torpaqların Elektron Kadastr Uçotu İnformasiya Sistemi nəticəsində reallaşacaq.

Hazırda müasir metodlardan, beynəlxalq təcrübədən, innovativ texniki imkanlardan istifadə edərək torpaqların elektron kadastr işləri davam etdirilir. Sistemə daxil olacaq növbəti rayon Goranboydur. Bununla əlaqədar rayonda işlərə start verilib”,- bildirilib.

Belə ki, bölgə ictimaiyyətini məlumatlandırmaq, görüləcək işlərin mahiyyəti, əldə olunacaq nəticələr, yaradılacaq sistemin üstünlüklərinin izah olunması məqsədilə bu gün rayon ərazisində tədbir keçirilib. Torpaqların Elektron Kadastr Uçotu İnformasiya Sisteminin yaradılmasında əsas məqsəd ölkə ərazisində torpaq idarəetməsinin təkmilləşdirilməsi və ondan səmərəli istifadənin təmin edilməsidir. Bu sistemin təşkili ilə mülkiyyət növündən və təyinatından asılı olmayaraq bütün torpaqların sərhədləri, keyfiyyət və kəmiyyət göstəriciləri, həndəsi ölçüləri və digər məlumatlar elektron bazaya toplanır.

Bildirək ki, sistem bölgədə bütün kateqoriyalardan olan keyfiyyətli torpaqların yerləşdiyi ərazi və sahələrini dəqiq müəyyən etməyə, torpaqlardan təyinatı üzrə istifadənin vəziyyəti ilə bağlı məlumatlar əldə etməyə imkan verəcək.

Torpaq ərazilərində yerləşən daşınmaz əmlaklar barədə məlumatların bazaya daxil edilməsi ilə əmlaka dair çıxarışların verilməsi və digər qeydiyyat xidmətləri vətəndaşlara sadə və sürətli formada göstəriləcək. Elektron kadastr uçotu sistemi torpaq üzərində dövlət nəzarətinin təşkilində və torpaqların elmi əsaslarla idarə edilməsi sahəsində operativ imkanlar yaradacaq.

Qeyd edək ki, ümumilikdə 19 rayonda torpaqların elektron kadastr uçotu işləri yekunlaşıb, 8 rayonda isə görülən işlərin nəticələri ilə bağlı təqdimatlar keçirilib və praktiki istifadəsinə başlanılıb.

Xeberler.az


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.