AZNET

«Google», «Facebook», «Yahoo» kimi dünyaca məşhur şirkətlər dəfələrlə müraciət edərək Azərbaycanda öz bizneslərini inkişaf etdirmək istədiklərini bildiriblər.

Bunu Rabitə və Yüksək Texnologiyalar Nazirliyinin (RYTN) Beynəlxalq Əlaqələr və Hesablaşma Mərkəzinin texniki direktoru Məzahim Quliyev bildirib.

Onun sözlərinə görə, Azərbaycanda yüksək texnologiya, innovativ tutumlu məhsulların istehsalı və xarici bazarlara çıxarılması üçün münbit zəmin formalaşıb: "Ölkəmizdə maliyyə resurslarına çıxışlar xeyli asanlaşıb, əcnəbi investisiyaları cəlb etmək üçün lazım olan addımlar atılır. Bunun üçün ilk şərt olan hüquqi baza yaradılıb və onun həyata keçirilməsi üçün funksional mexanizmlər hazırdır".

Ölkədə qurulmaqda olan və yaxın zamanlarda istifadəyə verilməsi planlaşdırılan Data Mərkəzin yaradılması, strateji əhəmiyyəti və əsas funksiyaları barədə qeyd edilib ki, yaxın gələcəkdə onun vasitəsilə həm rabitənin yüksək səviyyədə təminatına, həm də telekommunikasiya mərkəzinin geniş təchizatına şərait yaradılacaq: "Bunun üçün dövlət strukturları ilə birlikdə müəyyən işlər həyata keçirilir. Yuxarıda adı çəkilən nəhəng şirkətlərin öz serverlərini yeni qurulan Data Mərkəzdə yerləşdirməsi ilə hazırda bəzi hallarda müşahidə edilən trafikin ləngimə məsələsi də tam aradan qalxacaq. Bəzən istehlakçılar şikayət edir ki, internetin keyfiyyətində problemlər var və sürətdə ara-sıra müəyyən ləngimələr müşahidə edilir. Data Mərkəzin istifadəyə verilməsi və böyük İT şirkətlərinin ölkəmizdə bizneslərini inkişaf etdirməsi nəticəsində yerli istehsalçılar üçün də geniş imkanlar yaranacaq və onlar bundan faydalana biləcəklər”.

Qeyd edilib ki, Data Mərkəzin may ayında sınağı keçiriliəcək. Bu mərkəzin qurulması ilə Azərbaycanda İKT sahəsində yeni era başlayacaq. 

xeberler.az