STARTAP AZƏRBAYCAN

Məlumat verdiyimiz kimi, Azərbaycan Respublikası Rabitə və Yüksək Texnologiyalar Nazirliyinin tabeliyində İnformasiya Texnologiyalarının İnkişafı Dövlət Fondunun elan etdiyi 4-cü qrant müsabiqəsinə layihələrin qəbulu başa çatıb.

Müsabiqə çərçivəsində Fonda 121 layihə təqdim edilib. Layihələr Fondun rəsmi internet səhifəsində (www.ictfund.gov.az) qeydiyyatdan keçməklə elektron qaydada təqdim olunub.

Müsabiqəyə təqdim edilmiş layihələrin  müsabiqənin qaydlarına uyğun olaraq ilkin –texniki ekspertizası aparılıb. Belə ki, Dövlət Fondunun əməkdaşları tərəfindən layihələrin tərtibatının Fondun Əsasnaməsinə uyğunluğu yoxlanılıb.

Fonddan Xeberler.az-a verilən məlumata görə, bu mərhələdən 112 layihə keçib.

Qeyd edək ki, müsabiqəyə təqdim olunmuş layihələrin prioritet istiqamətlər üzrə bölgüsü müvafiq olaraq 47, 25 və 49 (cəmi 121) olub.

 Fondun qrant müsabiqəsinə təqdim edilən layihələr 2 mərhələdə qiymətləndirlir.

Birinci mərhələ qeyd etdiyimiz kimi, başa çatıb və layihələr eskpertlərə göndərilib.

İkinci mərhələdə isə ilkin ekspertiza mərhələsindən keçmiş layihələr 20 iş günü müddətində müstəqil ekspertlər tərəfindən kompleks ekspertizadan keçirilir. Kompleks ekspertizanın nəticəsində müsbət rəy almış layihələr yekun qərarın qəbul edilməsi üçün Fondun Müşahidə Şurasına təqdim edilir.

Qeyd edək ki, layihələr Fondun rəsmi internet səhifəsində (www.ictfund.gov.az) qeydiyyatdan keçməklə elektron qaydada təqdim olunub.

Müsabiqəyə layihələrin qəbulu aşağıdakı prioritet istiqamətlər üzrə aparılıb:

1. e-xidmətlər üzrə texnologiya və həllərin inkişafı və kommersiyalaşdırılması;

2. innovativ İKT məhsulları nümunələrinin hazırlanması;

3. innovativ infrastrukturun inkişafı, o cümlədən yeni texnologiyaların inkişafı və onların kommersiyalaşdırılması istiqamətləri üzrə layihələrin qəbulu.

Fondun əsas məqsədi İKT sahəsində dövlət siyasətinin həyata keçirilməsinə yardım etmək, innovativ sahibkarlıq fəaliyyətini dəstəkləmək, intellektual biznes, innovasiya və elmi tədqiqat layihələrini stimullaşdırmaq, müasir infrastrukturun inkişafına təkan vermək, kiçik və orta sahibkarlıq subyektlərinə maliyyə dəstəyi göstərmək, bu sahəyə yerli və xarici investisiyaları cəlb etməkdən ibarətdir.

 Məltəm Talıbzadə