STARTAP AZƏRBAYCAN

Bugün “Startap Azərbaycan” layihəsi çərçivəsində Texniki Universitetin tələbələri ilə görüş keçirilib.

Xəbərlər-in məlumatına görə, görüşdə Elektron Hökumət Portalının və RYTN yanında İT-nin İnkişafına Dövlət Dəstək Fondunun da nümayəndələri iştirak edib.

Universitetin prorektoru professor Mustafa Babanlı tədbiri açaraq görüşün məqsədi barədə məlumat verib.

Daha sonra Startap Azərbaycan Təşkilat Komitəsinin üzvü, AİF-in prezidenti Osman Gündüz iştirakçılara “Startap Azərbaycan” layihəsindən danışıb.

Osman Gündüz  iştirakçılara layihə ilə bağlı ətraflı məlumat verib.

O, “Startap Azərbaycan” layihəsinin əsas məqsədləri, layihə çərçivəsində hazırda davam edən müsabiqə qaydaları, həmçinin müsabiqədəki yeni nominasiyalar haqqında danışıb.

Forum rəhbəri “Startap Azərbaycan” layihəsi  çərçivəsində həyata keçiriləcək tədbirlər, startapçılar üçün keçiriləcək təlimlərlə bağlı da məlumatlar verib.

Osman Gündüz “Startap Azərbaycan” müsabiqəsinin yekun təqdimat mərasiminin və finalçıların investorlarla görüşlərinin may ayının sonlarında keçiriləcəyini diqqətə çatdırıb.

Rabitə və Yüksək Texnologiyalar nazirliyi yanında İT-in İnkişafı Dövlət Fondunun layihələr üzrə iş sektorunun müdiri Əkbər Abbasov çıxış edərək Dövlət Fondunun həyata keçirdiyi layihələr, qrant müsabiqələri və qarşıda gözlənilən tədbirlər haqqında məlumat verib.

Görüşdə Elektron Hökumət Portalının nümayəndəsi Ruhəngiz Mehmanqızı da çıxış edib. O,  portal, həmçinin Açıq Məlumatlar portalı və onun üzərində hazırlanacaq mobil tətbiqlər haqqında danışıb.

Ruhəngiz Mehmanqızı  bu məqsədlə “Startap Azərbaycan” çərçivəsində keçirilən müsabiqənin də davam etdiyini  də bildirib.

“Startap Azərbaycan”-nın Təşkilat Komitəsinin üzvü, startapçı Orxan Əhmədov  Azərbaycanda startapların formalaşması və  bu sahədə beynəlxalq təcrübələri iştirakçılarla bölüşüb.

Toplantı diskussiya və tələbələrin sual-cavabları ilə davam edib.

“Startap Azərbaycan” TK  vurğulayıb ki, aprelin 11-də Yüksək Texnologiyalar Parkında “Startap Azərbaycan” müsabiqəsində iştirak edən startap komandaları üçün təlim keçiriləcək.

“Startap Azərbaycan” layihəsinin əsas məqsədi milli startapların üzə çıxarılmasına və inkişafına dəstək vermək, bu istiqamətdə maarifçilik işləri həyata keçirmək, ölkədə İnternet biznes mühitini yaxşılaşdırmaq və investorların bu sahəyə diqqətini artırmaq, innovativ ideyaların uğurlu biznes sahəsinə çevrilməsinə yardım etməkdir.

Startap Azərbaycan Layihəsinə  Rabitə və Yüksək Texnologiyalar Nazirliyi yanında  İT-nin İnkişafı Dövlət Fondu, Elektron Hökumət Portalının operatoru olan MHM və Yüksək Texnologiyalar Parkı dəstək verir.

“Startap Azərbaycan”-ın Akademik partnyoru ADA Universitetidir.  

İnfiPro, SİNAM , SMART Systems, Cybernet və Happy Baku şirkətləri  Startup Azərbaycan-a dəstək verirlər.

Məltəm Talıbzadə