İKT TƏHSİL

Əmək və Əhalinin Sosial Müdafiəsi Nazirliyi (ƏƏSMN) və Dünya Bankının birgə “Sosial Müdafiənin İnkişafı Layihəsi” çərçivəsində Azərbaycan Dövlət İqtisad Universitetində tələbə və məzunların yiyələndikləri ixtisaslar üzrə nəzəri biliklərlə yanaşı, praktik bacarıqlara malik olmaları üçün virtual müəssisənin rəsmi açılış mərasimi keçirilib.

ƏƏSMN İctimaiyyətlə əlaqələr şöbəsindən Xeberler.az-a verilən məlumata görə, tədbirdə əmək və əhalinin sosial müdafiəsi naziri Səlim Müslümov çıxış edərək bildirib ki, Azərbaycan da sayı 7500 olan virtual müəssisələrin üzvlər şəbəkəsinə qəbul edilib.

"Ötən ildən etibarən ölkəmizdə ilkin olaraq Azərbaycan Dövlət İqtisad Universitetinin və Xəzər Universitetinin bazalarında bu təcrübənin tətbiqinə, virtual müəssisələrin yaradılması işlərinə başlanılıb”.

Nazir bildirib ki, bunun üçün müvafiq otaqlar ayrılaraq kompüter və digər lazımi avadanlıqlarla təchiz edilib və beynəlxalq ekspertlər tərəfindən bu təcrübə müəssisələrində çalışacaq müəllim heyəti üçün müvafiq təlimlər keçirilib.

Səlim Müslümov qarşıdakı dövrdə bu sahədə, eləcə də gənclərin əmək potensialının keyfiyyətcə yüksəldilməsi, interaktiv tədrisin yaxşılaşdırlması və s. sahələrdə Azərbaycan Dövlət İqtisad Universiteti ilə əməkdaşlığın genişləndirilməsinin, bu məqsədlə Anlaşma Memorandumu imzalanmasının da gündəlikdə duran məsələlərdən olduğunu qeyd edib, yeni virtual müəssisənin fəaliyyətinə uğurlar arzulayıb.

Təhsil naziri Mikayıl Cabbarov hər bir tələbənin, məzunun ixtisas bacarıqlarını reallaşdırmaları və təkmilləşdirmələri üçün virtual müəssisələrin yaradılması təcrübəsinin əhəmiyyətli olduğunu, bunun gənclərin karyera taleyində mühüm rol oynadığını diqqətə çatdırıb.

Sonra virtual müəssisənin fəaliyyətinə baxış olub.

Xeberler.az