SOSİAL MEDIA

Məlum olduğu kimi, ötən ildən başlayaraq “Ali təhsil müəssisələrində Yeni medianın  tədrisinin təkmilləşdirilməsi” layihəsinin icrasına başlanılıb.  Layihə Multimedia Mərkəzi tərəfindən  Bakı Dövlət Universitetinin Jurnalistika fakültəsi ilə sıx əməkdaşlıq şəraitində keçirilir.

Xeberler.az-ın məlumatına görə, layihə çərçivəsində yeni media sahəsi ilə əlaqəli fənlərin tədris modellərinin hazırlanması , jurnalistika təhsili verən hər bir ali təhsil müəssisəsi üçün Onlayn laboratoriya- onlayn qəzetin modulunun və  Yeni media texnologiyalarının tədris edən müəllimlərə köməklik məqsədilə elektron tədris resursun yaradılması, təlimlərin keçirilməsi  nəzərdə tutulur.  

Həmçinin layihə çərçivəsində yalnız bir ali təhsil müəssisəsində - BDU-nun  jurnalistika fakültəsində internet tv studiyanın yaradılması planlaşdırılıb.

Bu gün Layihə çərçivəsində görüləcək işlərlə bağlı BDU-nun rektoru, akademik Abel Məhərrəmovla görüş keçirilib. Görüşdə Layihənin direktoru , Azərbaycan İnternet Forumunun rəhbəri Osman Gündüz, Jurnalistika fakültəsinin dekanı Yalçın Əlizadə, Kafedra müdiri Cahangir Məmmədli və digər şəxslər iştirak ediblər .

Layihənin rəhbəri Osman Gündüz ABŞ - Azərbaycan Media İnkişafı Fondu tərəfindən dəstəklənən “Ali təhsil müəssisələrində Yeni medianın  tədrisinin təkmilləşdirilməsi ” layihəsi haqqında və layihə çərçivəsində BDU-da görülməsi nəzərdə tutulan işlər haqqında məlumat verib.

BDU-nun rektoru, akademik Abel Məhərrəmov Yeni media texnologiyalarının və bu  sahədə tədris prosesinin inkişaf etdirilməsinin mühüm əhəmiyyət kəsb etdiyini bildirib.

O, bu istiqamətdə atılan addımların, xüsusilə də yeni medianın tədrisinin Universitetlərdə təkmilləşdirilməsinin olduqca vacib olduğunu qeyd edib. Yaradılacaq İnternet studiyanın, onlayn resursların media bazarının tələblərinə cavab verən kadrlar hazırlanmasında önəmli rol oynayacağını bildirib. O, İnternet studiyanın digər Universitetlərin faydalanması  üçün də əhəmiyyət kəsb etdiyini vurğulayıb.

Görüşdə Abel müəllim tələbələrin praktiki bacarıqlarının artırılmasının daha mükəmməl sisteminin yaradılmasını sürətləndirmək üçün layihə çərçivəsində yaradılacaq İnternet Studiyanın Universitetin hesabına daha  da zənginləşdirilməsinə göstəriş verib.

O, yeni media texnologiyalarının tədrisi və praktiki təcrübə üçün gərəkli olan digər bütün yeni avadanlıqların dərhal Universitet hesabına alınması və quraşdırılmasına göstəriş verib. Eyni zamanda internet tv studiyanın daha geniş və şəraiti normal olan otaqda yaradılmasının və prosesin tezləşdirilməsinin vacibliyini qeyd edib.

Sonda Abel müəllim görüləcək işlərlə bağlı tövsiyələrini çatdırıb, layihə çərçivəsində görüləcək işlərə uğurlar  arzulayıb və  jurnalistika fakültəsinin modernləşdirilməsi istiqamətində yeni təklifləri gözlədiyini vurğulayıb.