Xaricdəki alimlərimiz haqda məlumatlar bir araya toplanacaq

12-04-2017 / 18:02

AMEA İnformasiya Texnologiyaları İnstitutunun Elmi şurasının bu gün keçirilən növbəti iclasında “Azərbaycan alimləri diasporası” informasiya sisteminin yaradılması məsələsi müzakirə olunub.

AMEA-dan Xeberler.az-a verilən  məlumata görə,  informasiya sistemi haqqında məlumat verən institutun şöbə müdiri Gülnarə Nəbibəyova bu sistemin  20 sentyabr 2016-cı il tarixli Sərəncam ilə təsdiq edilən “Azərbaycan Respublikasında informasiya cəmiyyətinin inkişafına dair Milli Strategiyanın həyata keçirilməsi üzrə 2016–2020-ci illər üçün Dövlət Proqramı”ndan irəli gələn vəzifələrin həyata keçirilməsinə xidmət etdiyini bildirib.

Onun sözlərinə görə, Dövlət Proqramı çərçivəsində yüksək texnologiyalar üzrə elmi-texniki potensialın gücləndirilməsi istiqamətində xaricdə yüksək texnologiyalar sahəsində çalışan azərbaycanlı alim və mütəxəssislərlə əməkdaşlığın genişləndirilməsi, birgə tədqiqat və proqramların həyata keçirilməsi üçün tədbirlərin görülməsi də nəzərdə tutulub.

G.Nəbibəyova bildirib ki, “Azərbaycan alimləri diasporası” informasiya sisteminin yaradılması məhz bu tədbirlərin həyata keçirilməsi məqsədini daşıyır. O, həmçinin informasiya sisteminin işlənilməsi üçün xaricdə yaşayan azərbaycanlı alimlərin fəaliyyəti haqqında dolğun məlumatların əldə olunmasının zəruriliyini diqqətə çatdırıb.

“Bunları nəzərə alaraq, xarici ölkələrdə fəaliyyət göstərən azərbaycanlı alimlər haqqında məlumatların əldə olunması üçün müvafiq təşkilatlara müraciətlərin ünvanlanması nəzərdə tutulur”, – deyə bildirən G.Nəbibəyova qeyd edi ki, bu məqsədlə xarici ölkələrdə fəaliyyət göstərən azərbaycanlı alimlər haqqında sorğu forması hazırlanıb.

Sonra AMEA-nın akademik-katibi, AMEA İnformasiya Texnologiyaları İnstitutunun direktoru, akademik Rasim Əliquliyev  çıxış edərək  “Azərbaycan alimləri diasporası” informasiya sisteminin yaradılmasının vacib məsələlərdən olduğunu bildirib.

 Akademik dünyanın müxtəlif ölkələrində fəaliyyət göstərən azərbaycanlı alimlər haqqında məlumatların bir araya toplanması baxımından böyük əhəmiyyətə malik olan bu sistemin “Virtual Azərbaycan”ın qurulmasına öz töhfəsini verəcəyinə əminliyini  vurğulayıb.

Günel

 


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə