PROQRAMLAR

Respublika ərazisində radionəzarət imkanlarının genişləndirilməsi və radiotezlik spektrinin daha səmərəli idarə olunması istiqamətində həyata keçirilən tədbirlər davam edir. Bu çərçivədə Kəlbəcərdə yeni günəş panelli avtonom radiomonitorinq stansiyası (RMS) quraşdırılaraq istismara verilib.

Xeberler.az məlumat verir ki, müasir texnologiyalar, o cümlədən SDR (proqram əsaslı radioqəbuledici) avadanlıqları ilə təchiz olunan stansiya vasitəsilə Kəlbəcər şəhəri və ətraf ərazilərdə radio yayımlarının, həmçinin radiotezlik spektrinin məsafədən operativ monitorinqi təmin edilir.

Bildirilib ki, yaradılan yeni infrastruktur radiomonitorinq proseslərinin daha çevik və effektiv həyata keçirilməsinə imkan yaradır. Stansiyanın texniki imkanları sayəsində günün istənilən vaxtında sistemə məsafədən qoşulmaq, real vaxt rejimində spektr məşğulluğunu izləmək, ölçmə nəticələrini təhlil etmək və radionəzarət proseslərini uzaqdan idarə etmək mümkündür.

Qeyd olunub ki, avtonom RMS-də müasir texnoloji tələblər nəzərə alınmaqla modernizasiya işləri aparılıb, videomüşahidə sistemi quraşdırılıb və enerji resurslarından səmərəli istifadə məqsədilə avadanlıqların məsafədən aktiv və ya deaktiv edilməsinə imkan verən idarəetmə funksiyası tətbiq olunub.

Kəlbəcərdə istifadəyə verilən yeni stansiya işğaldan azad edilmiş ərazilərdə radiotezlik spektrinin monitorinqi və radionəzarət imkanlarının gücləndirilməsi istiqamətində görülən işlərin növbəti mərhələsi hesab olunur.

Məlumata görə, Dövlət Radiotezliklər İdarəsi tərəfindən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində artıq Şuşa, Laçın, Zəngilan, Ağdam və Kəlbəcərdə avtonom radiomonitorinq stansiyalarının qurulması təmin edilib.

Bununla yanaşı, işğaldan azad olunmuş ərazilərdə təsdiq edilmiş iş planına uyğun olaraq radiomonitorinq, ölçmə, texniki nəzarət və vizual baxış tədbirləri davam etdirilir.