Birləşmiş Millətlər Təşkilatının (BMT) Ümumdünya Şəhərsalma Forumunun 13-cü essiyasında (WUF13) iştirak etmək məqsədilə ölkəmizdə səfərdə olan Esvatini Kralı Əlahəzrət III Msvatinin başçılıq etdiyi nümayəndə heyəti ASAN Xidmət mərkəzinin fəaliyyəti ilə tanış olub.
Xeberler.az bildirir ki, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ulvi Mehdiyev qonağa Prezident İlham Əliyevin təşəbbüsü əsasında yaradılmış “ASAN xidmət” mərkəzləri və innovasiyalar sahəsində həyata keçirilən layihələr barədə ətraflı məlumat verib.
Qonağa “ASAN xidmət” mərkəzlərinin fəaliyyətində tətbiq olunan müxtəlif texnoloji həllər ilə bağlı təqdimat edilib. Milli brendimiz olan ASAN-ın intellektual məhsul kimi ixracı istiqamətində 30-dan çox ölkə və beynəlxalq təşkilatla müqavilə imzalandığı diqqətə çatdırılıb.
Sonra “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Esvatini Krallığının müvafiq qurumu arasında dövlət xidmətlərinin göstərilməsinin qabaqcıl mexanizminin yaradılması sahəsində əməkdaşlığa dair Anlaşma Memorandumu” imzalanıb.
Memorandum “ASAN xidmət” təcrübəsinin Esvatinidə tətbiqini nəzərdə tutur.
Esvatini Kralı ölkəsində qısa müddətdə “ASAN xidmət” modelinin tətbiq edilməsi ilə bağlı nümayəndə heyətinə tapşırıq verib.
Sonda qonaqlar INNOLAND Incubation & Acceleration Center, Səyyar ASAN xidmətin, ABAD publik hüquqi şəxsin və Bilim Azərbaycan mərkəzinin fəaliyyəti ilə də tanış olublar.
