SOSİAL MEDIA

“Global State” statistik mərkəzinin hesabatına əsasən, ilin yanvar-aprel ayları ərzində Azərbaycanda  Facebook istifadəçilərinin sayı 8,6 faiz azalıb. 

Xəbərlər-in verdiyi məlumata görə, bu sosial şəbəkənin Azərbaycandakı bazar payı aprelin sonuna 80,1 faiz təşkil edib ki, bu da ötən ilin analoji dövr göstəricisini 16,8 faiz ötür.

Məsələ ilə bağlı Azərbaycan İnternet Forumunun prezidenti Osman Gündüz də açıqlama verib.

O, bu azalmanın son aylarda Facebook rəhbərliyi tərəfindən aparılan “təmizləmə” ilə bağlı ola biləcəyini  bildirib.  Bu baxımdan o , azalan statistikanın aktiv, real Facebook istifadəçilərinin deyil, saxta Facebook profilləri ilə bağlı olduğunu diqqətə çatdırıb.

“Bildiyiniz kimi Facebook bir müddət öncə bu sosial şəbəkə üzərində təmizləmə əməliyyatı apardı. Bu əməliyyat eyni zamanda Azərbaycanda da həyata keçirildi. Belə ki, aktiv olmayan, Facebook qaydalarını pozan, bir adamın adına beş hesab açan istifadəçilərin hesabları donduruldu, silindi. Hətta Azərbaycanda elə Facebook səhifələri oldu ki, onlarda yüz minlərlə izləyici bir anda  Facebook tərəfindən silindi. Deyə bilərəm ki, azalan rəqəmdir, real Facebook istifadəçilərinin sayı azalmayıb. Hətta real istifadəçi sayı  əvvəlki aylarla müqayisədə  artıb”.

Ruhəngiz Muradova