PROQRAMLAR

Qloballaşan dünya iqtisadiyyatında innovasiya hər bir ölkənin rəqabət üstünlüyü və milli iqtisadiyyatını gücləndirmək üçün strateji istiqamət olaraq qəbul edilir. Belə ki, innovativ sahibkarlıq yeni iş yerləri yaradır, texnoloji yeniliyi gətirməklə biznesi daha səmərəli edir, əmək bazarında müasir peşələrə tələbi artırır, ümumilikdə iqtisadiyyatın şaxələnməsini sürətləndirir və buna paralel olaraq ölkəyə xarici investisiya axınını stimullaşdırır.

Xeberler.az məlumat verir ki, bu barədə rəqəmsal inkişaf və nəqliyyat nazirinin müavini Samir Məmmədov regionlarda həyata keçirilən innovasiya proqramının yekun təqdimat mərasimində deyib.

“Ölkə daxilində biz innovasiyanın texnologiya əsaslı fəaliyyət imkanı kimi bir şəhərə və ya mərkəzə bağlı olmadığını da görürük. Bu texnoloji üstünlüyü mümkün edən təməl faktor rəqəmsal infrastruktur və yüksəksürətli internetin mövcudluğudur. Bu xüsusda “Onlayn Azərbaycan” layihəsinin ölkəmizin texnoloji inkişafında həlledici rolunu vurğulamaq istərdim. Sözügedən layihə respublikanın bütün ərazilərində həm biznes, həm də ev təsərrüfatlarını müasir texnologiyalar vasitəsilə yüksəksürətli, sabit genişzolaqlı internetlə təmin etdi.

Son 4 il ərzində ölkədə sabit genişzolaqlı, yüksəksürətli internetə çıxış imkanı yaradılmış təsərrüfatların sayı 13 dəfə artaraq təxminən 3 milyona çatdı, nəticədə ölkənin sabit genişzolaqlı internetlə əhatəsi tam təmin edildi. Bu layihə internet infrastrukturunu yaxşılaşdırmaqla yanaşı, ölkənin rəqəmsal gələcəyini formalaşdıran strateji addımlardan biri oldu.

Yüksəksürətli internetin yayılması Azərbaycanda texnoparkların fəaliyyət imkanlarını texniki cəhətdən genişləndirib. Belə ki, 2025-ci ilin yanvar–avqust ayları ərzində 2-si xarici olmaqla, ümumilikdə 26 hüquqi şəxsə texnopark rezidentliyi statusu verilmişdir. Bundan əlavə, 2023-cü ildə “Texnologiyalar Parkı haqqında nümunəvi Əsasnamə”yə edilmiş dəyişikliklərdən sonra 8-i xarici olmaqla, ümumilikdə 144 hüquqi şəxsə texnoparkdan kənar fəaliyyət üçün rezidentlik statusu təqdim olunmuşdur.

Onu da qeyd edim ki, texnoparkdan kənar fəaliyyət göstərmək üçün rezidentlik əldə etmiş hüquqi şəxslərin bizneslərinin inkişafına dəstək vermək məqsədilə onlardan müvafiq statistik məlumatlar toplanmış və həmin məlumatlara əsaslanaraq dəstək mexanizminin növbəti mərhələləri planlaşdırılmışdır. Bu çərçivədə sözügedən şirkətlərin böyüməsinə və ixrac potensialının artırılmasına töhfə verəcək layihələrin həyata keçirilməsi nəzərdə tutulur”, - deyə Samir Məmmədov əlavə edib.