KOSMOS

Avqustun 19-da Yaponiyada beynəlxalq kosmik stansiyaya (BKS) yönələn Konotori (Leylək) pilotsuz kosmik gəmisi uğurla orbitə buraxılıb.

Xeberler.az AZERTAC-a istinadən məlumat verir ki, Yaponiya Aerokosmik Tədqiqatlar Agentliyindən (JAXA) bildirilib ki, buraxılış zamanı heç bir ştatdankənar vəziyyət qeydə alınmayıb.

H2-B raketdaşıyıcısının buraxılışı yerli vaxtla 20:50 dəqiqədə Taneqaşima kosmodromundan həyata keçirilib. Kosmik gəminin buraxılışı əvvəlcə avqustun 16-a planlaşdırılsa da hava şəraitinin əlverişsiz olması səbəbindən bu tarix iki dəfə dəyişdirilib.

Kosmik gəminin buraxılışını hazırda BKS-də olan yapon astronavt Kimiya Yui canlı olaraq izləyib. JAXA-nın startöncəsi yayımladığı videomüraciətdə o deyib: “Buraxılışın uğurlu olması üçün çox həyəcanlıyam”.

Yeni gəmi olan Konotori iyulun ortalarında ictimaiyyətə təqdim olunub və beşinci sıra nömrəsi alıb. Onun uzunluğu 10, diametri isə 4 metr təşkil edir. Bu gəmi BKS-yə çəkisi 5,5 ton olan irihəcmli yük çatdırmağa qadirdir. Əvvəllər də kosmosa dörd belə aparat göndərilib və onların hamısı missiyasını uğurla yerinə yetirib.

Konotori yalnız bir dəfə istifadə edilən kosmik gəmidir. O stansiyaya lazım olan ehtiyatı çatdırmağa və oradakı tullantını götürməyə qadirdir. Gəmi geri qayıdarkən atmosferin qalın qatlarında yanaraq məhv olur.

Xeberler.az