Xeberler.az-ın məlumatına görə, "Azərbaycan Hava Yolları" QSC-nin mətbuat xidməti bildirib ki, Azərbaycanın daha altı hava limanının, o cümlədən Xankəndi aeroportunun beynəlxalq məkan indeksləri kataloquna daxil edilməsi təsdiqlənib.
Bu hava limanı Xocalı aeroportudur.
Bu haqda Azərbaycan İnternet Formunun Prezidenti, ekspert Osman Gündüz açıqlama verib:
"Bir neçə il öncə ermənilər Xocalı hava limanını yenidən quraraq onu yenidən Xankəndi hava limanı ediblər.
Uzun müddət olardı ki, Azərbaycan hökuməti beynəlxalq qurumlara, Beynəlxalq Mülki Aviasiya Təşkilatı və Mülki Aviasiya üzrə Avropa Konfransına təsirlər edərək separatçıların bu aeroportdan istifadəsinə imkan vermirdi.
Hətta uçuşlar olarsa təyyarələrin vurulacağı bildirilmişdi. Ona görə də bu hava limanı uzun müddət separatçıların üzünə bağlı qalmışdı. Lakin açıqlamadan görsənir ki, Xankəndi hava limanına artıq beynəlxalq aeroport statusu veriləcək və fəaliyyətə başlayacaq. Çox düşündürücü və hələlik anlaşılmaz ola biləcək bir məlumatdır".
Xankəndi hava limanı kimin nəzarətində olacaq? Burada viza məsələlərinə, giriş-çıxışa, gömrük rəsmiləşdirmələrinə kim nəzarət edəcək?
Osman Gündüz bildirib ki, Qarabağda separatçılıq yeni başlayanda, 90-cı illərin əvvəllərində də bu hava limanına nəzaərt üstündə xeyli mübarizə getmişdi.
O zaman bir müddət bu aeroport rusların nəzarətində olmuşdu və ermənilər təyyarələrlə xeyli silah gətirə bilmişdilər. Bu səbəbdən də o zaman nəzarət bir müddət OMON -a verilmişdi.
İndi necə olacaq?
Xankəndi –İrəvan, Xankəndi- Moskva, Xankəndi -Paris və s. beynəlxlaq reysləri açılacaqmı?
"Bu hava limanı bütün Miatsum sevərlərin üzünə açılacaqsa çox ciddi problemlər yaranacaq. Əgər hava limanına yalnız rusiyalı sülhməramlılar nəzarət edəcəksə, yalnız separatçıalrın istifadəsində beynəlxalq uçuşlar olacaqsa, düşünürəm ki, bu ağlasığmaz nəticələrə gətirib çıxaracaq.
Fikrimcə, yalnız Azərbaycanın nəzarətində olmaqla, ən pis halda keçid dövrü üçün Türkiyə-Rusiya nəzarəti çərçicvəsində Xankəndi hava limanının fəaliyyətinə imkan vermək olar.
Uzun illərdir ki, bu aeroportun istifadəsi üçün ermənilər min cür yollara əl atıblar.
Lakin on illərdi ki, buna nail ola bilməyiblər. İndiyədək heç bir uçuş reallaşdıra bilməyiblər.
Yeri gəlmişkən, qeyd etmək yerinə düşər ki, indiyədək bu hava limanını separatçıların üzünə bağlı saxlamaq Azərbaycan hökumətinin böyük uğuru hesab oluna bilər.
Ümid edirəm və inanıram ki, bundan sonra da bu hava limanından separatçıların müstəqil istifadəsinə imkan verilməyəcək".
