GoMap.az (www.Gomap.az) online naviqatoruna Gürcüstanın elektron xəritəsi daxil edilib.
Elektron xəritənin əhatəsinin genişləndirilməsi üzrə işlər GoMap.az –ın inkişaf strategiyası çərçivəsində SINAM şirkəti tərəfindən aparılır.
Genişləndirilmiş GoMap.az-ın təqdimatı aprelin 12-14-də Bakı Ekspo mərkəzində keçiriləcək “Turizm və Səyahət”, Azərbaycanın XI beynəlxalq sərgisində olacaq.
Gürcüstanın elektron xəritəsinə 22,1 min obyekt, 8,8 min kilometr avtomobil yolu, 3,1 min yaşayış məskəni, 15,3 min kvadrat kilometr meşə və yaşıllıq massivi, həmçinin 570 kvadrat kilometr su resursu (çay, göl, daxili sular) daxil edilib.
Azərbaycanın elektron xəritəsinə isə 70 şəhər, 4530 yaşayış məskəni, 3300 tarixi və mədəni abidələr, 670 min bina və tikililər, 47 min yol, 23,770 km meşə və yaşıllıq massivi və sair daxil edilib.
Xəritə 3D formatında nümayiş oluna bilir, həmçinin tarixi və mədəniyyət abidələrinin təsvirlərini özündə saxlayır.
GoMap.az üç dildə fəaliyyət göstərir ( Azərbaycan, ingilis və rus).
Genişləndirilmiş Gomap.az turistlərə Azərbaycan və Gürcüstan ərazisində mədəni, tarixi obyektlərə daha rahat şəraitdə çata bilmək üçün istiqaməti müəyyən etməyə imkan verir.
