EDUTECH

Ölkə üzrə təhsilin rəqəmsallaşdırılması istiqamətində həyata keçirilən tədbirlərə dair media nümayəndələri üçün brifinq təşkil olunub. Brifinqi Təhsil Sisteminin İnformasiyalaşdırılması İdarəsinin rəisi Vüsal Xanlarov aparıb.

Xeberler.az bildirir ki, tədbirdə təhsil sistemində rəqəmsal transformasiyanın əsas istiqamətləri, əldə olunan nəticələr və qarşıda duran strateji hədəflər barədə geniş məlumat verilib.

Bildirilib ki, təhsilin rəqəmsallaşdırılması üç əsas istiqamət üzrə həyata keçirilir: Azərbaycan Təhsil Şəbəkəsinin genişləndirilməsi, təhsil müəssisələrinin İKT avadanlıqları ilə təminatının gücləndirilməsi və rəqəmsal həllərin tətbiqi. Son illərdə təhsil müəssisələrində internet trafiki artıb, şəbəkə infrastrukturu modernləşdirilib və kompüter təminatı yaxşılaşdırılıb. 2026-cı ilin sonunadək kompüter–şagird nisbətinin 1:6 səviyyəsinə çatdırılması planlaşdırılır.

Qeyd olunub ki, Təhsil Mərkəzləşdirilmiş İnformasiya Sistemi çərçivəsində məktəbəqədər, ümumi, peşə, ali və xaricdə təhsil pillələri üzrə informasiya sistemləri vahid platformada birləşdirilib. Hazırda 40-dan çox informasiya sistemi MyGovİD / SİMA vahid giriş mexanizminə qoşulub və Elektron Hökumət İnformasiya Sistemi ilə inteqrasiya olunub.

Bununla yanaşı, 8 adda təhsil arayışı və “Təhsil ödənişləri” xidməti MyGov platformasına inteqrasiya edilib. Ali və orta ixtisas təhsili üzrə köçürülmə, abituriyentlərin elektron qeydiyyatı və məktəbəqədər təhsil müəssisələrinə qəbul prosesləri artıq elektron formada həyata keçirilir.

“Rəqəmsal Məktəb” platformasının 2025-ci ilin sentyabr ayından etibarən Bakı şəhərində tətbiq edildiyi bildirilib. Hazırda platformadan 354 məktəb, 543 mindən çox şagird, 360 mindən artıq valideyn və 44 mindən çox müəllim istifadə edir. Platforma çərçivəsində I–XI siniflər üzrə 9 mindən çox tədris videosu və rəqəmsal resurs hazırlanaraq istifadəyə verilib.

Brifinqdə həmçinin Microsoft ilə əməkdaşlıq çərçivəsində Copilot süni intellekt alətinin “Rəqəmsal Məktəb” platformasına inteqrasiya edildiyi qeyd olunub. Bu alət müəllimlərə dərs planlaşdırılması, tədris materiallarının hazırlanması və məzmunun təhlili kimi istiqamətlərdə dəstək verir.

Eyni zamanda bildirilib ki, Nazirlər Kabinetinin yeni qaydalarına əsasən diplomlar, attestatlar və sertifikatlar tam elektron formatda təqdim olunacaq. Təhsil sənədləri elektron sistem üzərindən əldə ediləcək və onlayn doğrulama imkanı təmin olunacaq.

Sonda vurğulanıb ki, həyata keçirilən tədbirlər təhsildə əlçatanlığın və keyfiyyətin artırılmasına, rəqəmsal bacarıqların inkişafına və müasir təhsil mühitinin formalaşdırılmasına xidmət edir.