AZNET

“Açıq Təhsil Təhlili” (“Open Education Analytics”) rəqəmsal icmaya üzv ölkələrin görüşü baş tutub. Görüşdə üzv ölkələrlə yanaşı Misir, El Salvador, Estoniya, Hindistan, İsrail, Malayziya, Nigeriya, Oman, Filippin, Sinqapur, Tunis təhsil nazirlikləri və departamentlərinin  rəhbər heyəti iştirak edib. 

Xeberler.az bildirir ki, görüş çərçivəsində rəqəmsal təhsil ekosisteminin formalaşdırılması üzrə müxtəlif ölkələrdə tətbiq olunan yeniliklər təqdim edilib. 

Görüşdə iştirak edən Təhsil Sisteminin İnformasiyalaşdırılması İdarəsinin rəisi Vüsal Xanlarov Azərbaycanda pandemiya zamanı tətbiq olunan “Virtual məktəb” layihəsi və post pandemiya dövründə təhsilin rəqəmsal transformasiyası təşəbbüsləri barədə çıxış edib. Vüsal Xanlarov qeyd edib ki, Azərbaycanda bütün təhsil pillələri üzrə yeni informasiya sistemləri qısa zamanda yaradılaraq istifadəyə verilib, nəticədə data və süni intellektin effektiv tətbiqi üçün geniş perspektivlər yaranıb.
  
Daha sonra, ABŞ-ın Corciya ştatının təhsil departamentində tətbiq olunan süni intellekt həlləri dinlənilib, təqdimatlar əsasında ölkələr arasında müzakirələr aparılıb və Azərbaycanda təhsilin rəqəmsal transformasiyası üzrə aparılan işlər iştirakçılar tərəfindən uğurlu qiymətləndirilib. 

Qeyd edək ki, “Açıq Təhsil Təhlili” “Microsoft” korporasiyasının təhsil istiqaməti tərəfindən əlaqələndirilir və təhsil sahəsində müasir analitika üçün bilik mübadiləsini, əməkdaşlığı, təhsil resurslarını və ən yaxşı təcrübələri təşviq edir. Bu icma eyni zamanda üzv ölkələrin təhsil sistemlərinin data əsaslı təhlil alətlərini təkmilləşdirmək  üçün  mütəmadi görüşlər təşkil edir. Təhsil Nazirliyi icmada digər 4 ölkənin -  ABŞ, Finlandiya, Birləşmiş Ərəb Əmirlikləri və Avstraliya nümayəndələri ilə yanaşı, 2020-ci ildən etibarən iştirak edərək, ölkədə pandemiya dövründə qurulmuş məsafədən təhsil,  elektron xidmətlər və informasiya sistemlərinin tətbiqi təcrübəsini bölüşür.