Azərbaycan İnternet Forumunun prezidenti, ekspert Osman Gündüz Dövlət Vergi Xidmətinin açıqladığı 2025-ci il üzrə ən çox vergi ödəyən 100 qurumun siyahısını şərh edib.
Xeberler.az bildirir ki, o, sosial media hesabında bildirib ki, siyahı şəffaflıq baxımından müsbət addım olsa da, texnologiya sektorunun payında azalma müşahidə olunur. Ekspertin sözlərinə görə, 2024-cü ildə TOP-100-də təxminən 12 texnologiya və telekommunikasiya şirkəti yer aldığı halda, 2025-ci ildə bu rəqəm 8-ə enib.
Osman Gündüzün sözlərinə görə, 2025-ci ildə ən çox vergi ödəyən texnologiya şirkətləri arasında Azercell (115,7 mln manat), Azerconnect Group (81,2 mln manat), ABC-Telecom (40,1 mln manat), Caspian Tech (39,8 mln manat), Bakcell (26,5 mln manat), Bestcomp Group (17,5 mln manat), Delta Telekom (17,0 mln manat) və AzerTelekom (15,5 mln manat) yer alıb.
Ekspert vurğulayıb ki, sektorun əsas vergi yükü yenə də mobil operatorlar və infrastruktur provayderlərinin üzərinə düşür. Dövlət sifarişləri ilə fəaliyyət göstərən bir çox İT şirkətlərin isə siyahıda yer almaması diqqət çəkir.
Osman Gündüz qeyd edib ki, bəzi şirkətlər üzrə maraqlı dəyişikliklər də müşahidə olunur. Məsələn, Bestcomp Groupun ödədiyi vergi artaraq 17,5 milyon manata çatıb, Delta Telekomun göstəriciləri isə azalıb. Bunun fonunda AzerTelekomun TOP-100-ə daxil olması diqqət çəkir.
Ekspertin fikrincə, İT sektorunda vergi ödəyicilərinin sayının və həcminin azalmasına bəzi siyasət qərarları, o cümlədən iri şirkətlərə verilən vergi güzəştləri təsir göstərə bilər. O əlavə edib ki, bu güzəştlərə baxmayaraq, ekosistemə, ixraca və məhsul yaradılmasına ciddi töhfələr hələlik gözə çarpmır.
Sonda Osman Gündüz hökuməti dövlət sifarişlərində rəqabətin artırılmasına, ixracyönümlü İT şirkətlərə dəstəyin gücləndirilməsinə, startap və KOB-ların bu sahəyə çıxışının genişləndirilməsinə çağırıb. Eyni zamanda, o, qlobal platformaların – Google, Meta, Apple və TikTok kimi şirkətlərin Azərbaycanda ödədiyi vergilərin açıqlanmasının sektordakı real vəziyyətin daha aydın görünməsinə kömək edəcəyini bildirib.
