TƏDBİRLƏR

Bakıda ilk dəfə olaraq “Türk İnvestisiya Fondu və Türk Ticarət və Sənaye Palataları Birliyinin (TCCI) biznes liderləri ilə məlumatlandırma görüşü” keçirilib.

Xeberler.az bildirir ki, Azərbaycan Sahibkarlar (İşəgötürənlər) Konfederasiyasının təşkil etdiyi görüşə ABB də dəstək verib. Belə bir görüşün məqsədi sahibkarlara Türk İnvestisiya Fondunun fəaliyyəti haqqında məlumat vermək, onlara Fondun imkanlarından faydalanmaqda dəstək olmaqdır.

Tədbirdə energetika, infrastruktur, texnologiya, kənd təsərrüfatı, logistika, turizm və s. sektorlara investisiya imkanları barədə təqdimatlar olub. O cümlədən, Türk Ticarət və Sənaye Palataları Birliyinə üzv ölkələrdə biznes və investisiya imkanları mövzusunda təqdimatlar dinlənilib. Həmçinin Birliyin Qadın Sahibkarlar Şurasının fəaliyyəti haqqında məlumatlar təqdim edilib.

Tədbir çərçivəsində Türk İnvestisiya Fondu ilə Türk Ticarət və Sənaye Palataları Birliyi arasında anlaşma memorandumu imzalanıb. Memorandum gələcək əməkdaşlıq perspektivlərini nəzərdə tutur.

Tədbirdə Türk Dövlətləri Təşkilatının Baş katibi Kubaniçbek Omuraliyev, Azərbaycan Respublikasının iqtisadiyyat nazirinin birinci müavini Elnur Əliyev, Türk İnvestisiya Fondunun prezidenti Bağdad Əmrəyev, TCCI təşkilatına üzv ölkələrin ticarət palatalarının rəhbərləri, bu dövlətlərin Azərbaycandakı fövqəladə və səlahiyyətli səfirləri də iştirak edib.

ABB-nin müasir, faydalı, universal məhsul və xidmətləri barədə məlumatları Bankın filial və şöbələrindən, https://abb-bank.az/ rəsmi internet səhifəsindən və ya 937 nömrəli Məlumat Mərkəzindən, həmçinin rəsmi Facebook səhifəsindən əldə etmək olar.