AZNET

Hava Qüvvələri «Wikileaks», «New York Times», «Guardian» və «Der Spiegel»-i oxumağı qədağan etdi.

ABŞ Hava Qüvvələri ölkəsəfirliklərinə məxsus məxfi yazışmaları ifşa edən «Wikileaks» saytı və bu saytla əməkdaşlıq edən üç mətbuat orqanının saytlarına girişi bloklayıb. Bu addım Ağ Evin Nəzarət və Büdcə Bürosunun «Wikileaks» və digər saytlar vasitəsilə yayımlanan sənədlərə hökumət işçilərinin və hökumətlə əlaqəli təşkilatların çıxışına qoyduğu qadağaya uyğun olaraq atılıb.

Hava Qüvvələrində çalışan mayor Toni Touns «Wikileaks»-lə yanaşı, saytın əməkdaşlıq etdiyi ABŞ-ın «New York Times», İngiltərənin «Guardian» qəzetləri və Almaniyanın «Der Spiegel» jurnalının internet saytlarına da girişi bloklayıb. T.Touns bu qərarın Ağ Evdən gələn təlimata uyğun olduğunu bildirib: «Bu qərar avqustda qəbul edilən və Hava Qüvvələri personalının «Wikileaks» vasitəsilə məxfi sənədləri oxuması və ya kompüterə yükləməsini qadağan edən təlimata uyğun olaraq verilib». Başqa saytlara qarşı tətbiq edilən qadağalara gəlincə, Touns bu qərara aydınlıq gətirə bilməyib.

«Wikileaks»-in son illər açıqladığı məxfi sənədlərdən ən çox payını alan dövlət təşkilatlarından Daxili İşlər və Müdafiə nazirlikləri sızdırılan sənədlərin təsirini yüngülləşdirmək üçün yeni tədbirlərə əl atacaqlarını bəyan etmişdilər.
Qeyd edək ki, İngiltərə məhkəməsinin qərarı ilə 380 min dollar girov müqabilində «Wikileaks» saytının qurucusu Culian Asanj barəsində həbs qətimkan tədbiri dəyişdirilib. Amma İsveç tərəfinin şikayəti üzündən Asanjın dərhal azad edilməsi mümkün olmayıb. Qərar Ali Məhkəmədə təsdiqləndikdən sonra Asanj ev dustağı olacaq. Məhkəmə prosesi gələn ilin yanvarında davam edəcək. Xatıradaq ki, İsveç prokurorluğu Asanja qarşı şübhəli seksual təcavüz ittihamları irəli sürüb. «Zərərçəkən» qızlar Asanjla könüllü olaraq əlaqədə olsalar da, İsveç qanunlarına əsasən Asanj qoruyucu vasitədən istifadə etməmək və ya qüsurlu vasitədən istifadə etməkdə günahlandırılır. Əsas iddiaçı Anna Ardinin ABŞ-ın Mərkəzi Kəşfiyyat İdarəsi ilə əlaqələri də üzə çıxıb.