İNNOVASİYA VƏ STARTAP

2021-ci ildə "Gələcək üçün bacarıqlar" adı ilə bu layihəyə başladıq. Ölkənin bütün aparıcı universitetlərində layihə dəstəkləndi. İnnovasiyalar, rəqəmsallaşma müasir dövrümüzün aparıcı sistem rolunu oynayır. Artıq rəqəmsal həllər həyat tərzimizə çevirilib və bu dünyada gedən qlobal bir trenddir. Qürurla deyə bilərik ki, Azərbaycan bu qlobal trendin hərəkətverici qüvvələrindən biridir.

Xeberler.az bildirir ki, bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev “ASAN xidmət”in “Gələcək üçün bacarıqlar” layihəsi çərçivəsində təşkil olunan IV "TUSİ" inkubasiya proqramının “Demo Day” tədbirində çıxış edərkən deyib.

Ülvi Mehdiyev bildirib ki, innovasiya və texnologiyalar iqtisadiyyat və sənaye sahələrində öz əksini tapır. “Ancaq idarəetmədə müasir texnologiyalardan istifadə etmək, vətəndaşlara şəffaf və əlçatan xidmətlər təqdim etmək barədə dünyada danışılmayanda Azərbaycanda Prezident İlham Əliyev tərəfindən “ASAN xidmət” modelinin əsası qoyuldu. Bu gün bu modelin uğurlarını ölkə xaricində də görürük. Bir sıra ölkələr bu model öyrənir və tətbiq edir. Biz startaplara dəstək üçün "İNNOLAND" İnkobasiya və Akselerasiya adlı mərkəz yaratdıq. Bu ad da təsadüfi seçilməyib. Bu mərkəz neft kapitalını insan kapitalına çevirməyi hədəfləyən bir mərkəzdir. Təbii ki, "İNNOLAND" kimi mərkəzlərin yaranması işin kiçik tərəfidir. Əsas məsələ ideyaların yaranması və dəyərə çevrilməsidir. Universitetlərin dəstəyi ilə mentor proqramları keçirilməyə başlanıldı. Əldə edilən biliyin biznesə çevrilməsi ilə bağlı bu layihədə əhəmiyyətli addım atılıb. 2023- cü ildən bu günə qədər "İNNOLAND" mərkəzi 300-dən çox startap formalaşdırıb", deyə Dövlət Agentliyinin sədri diqqətə çatdırıb.