SÜNİ İNTELLEKT VƏ DATA

“ASAN xidmət” 2024-2026-cı illər üçün idarəetmədə süni intellekt həllərinin tətbiqi ilə bağlı bir strategiya qəbul edib. Onun ilkin mərhələsi olaraq “ASAN xidmət”in Çağrı Mərkəzində süni intellekt proqramının tətbiqi layihəsidir. “ASAN xidmət”in Çağrı Mərkəzi illik bir milyondan çox zəng qəbul edən mərkəzdir. Burada bütün dövlət xidmətləri ilə bağlı zənglər qəbul edilir, xidmətlərlə bağlı məlumatlar verilir, təklif və şikayətlər toplanılır.

Xeberler.az xəbər verir ki, bunu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev “ASAN xidmət”lə Koreya Beynəlxalq İnkişaf Agentliyinin Azərbaycan nümayəndəliyi arasında “Mərkəzləşdirilmiş Dövlət Xidmətləri Çağrı Mərkəzinin optimallaşdırılmasında Süni İntellektin Tətbiqi” kiçikhəcmli inkişafa rəsmi yardım layihəsi çərçivəsində təhvil-təslim protokolunun imzalanma mərasimində deyib.

“Çağrı Mərkəzinin süni intellekt proqram təminatı sırf Azərbaycanın yerli mütəxəssisləri tərəfindən hazırlanıb. Onun avadanlıq təminatı Koreya tərəfinin dəstəyi ilə xüsusi qrantla təmin olunub. Artıq biz bu avadanlıq və proqram təminatı ilə yaxın aylarda Çağrı Mərkəzində tamamilə süni intellekt həllərini tətbiq edəcəyik. Bu dəstəyə görə Koreya tərəfinə minnətdarlığımı bildirirəm. Bundan sonra da texnologiya və innovasiyalar sahəsində Koreya tərəfi ilə əməkdaşlığa hazır olduğumuzu bəyan edirəm”, - deyə Ü.Mehdiyev qeyd edib.