TƏDBİRLƏR

Ötən il ərzində ölkə üzrə bankomatların sayında 6,2 faiz, o cümlədən regionlarda yerləşən bankomatların sayında isə 2,7 faiz artım müşahidə edilib.

Xeberler.az məlumat verir ki, bu barədə Azərbaycan Mərkəzi Bankının illik “Rəqəmsal Ödənişlər İcmalı”nda bildirilib.

Bu ilin əvvəlinə dövriyyədə olan POS-terminalların sayı 2023-cü illə müqayisədə 38,4 faiz artaraq 119,5 min ədədə bərabər olub. Təmassız ödənişləri qəbul edən POS-terminalların sayı isə müvafiq dövr ərzində 41,4 faiz artaraq 117,3 min ədəd təşkil edib. Quraşdırılmış POS-terminalların 98,1 faizi təmassız ödənişləri dəstəkləyir. Regionlarda pərakəndə ticarət, ictimai iaşə və xidmət müəssisələrində quraşdırılmış POS-terminalların sayı 17,1 min və ya 61,6 faiz artıb.

Əməkhaqqı kart sahiblərinin nağdsız ödənişlərdən istifadə vərdişlərində kəskin artım müşahidə olunur. Belə ki, 2024-cü ildə əməkhaqqı kartları vasitəsilə həyata keçirilən ödənişlərin 47 faizi nağdsız formada icra olunub. Sosial kartlar vasitəsilə həyata keçirilən ödənişlərdə isə nağdsız əməliyyatların çəkisi son 3 il ərzində 8 faiz bəndi artaraq 16 faizə bərabər olub. Texnoloji həllərin inkişafının istehlakçıların davranışına təsiri illər ərzində kartların istifadə vasitəsinə də əhəmiyyətli təsir göstərib. 2019-cu ildə kart əməliyyatlarının say üzrə 52 faizi bankomatlar vasitəsilə aparıldığı halda, 2024-cü ildə bu göstərici 10 faizə enib.

Kartlarla aparılan əməliyyatlarda POS-terminal ödənişlərinin say üzrə çəkisi 2019-cu ildə 17 faiz olduğu halda, 2024-cü ildə müvafiq göstərici 34 faizə yüksəlib.

Ən böyük artım isə elektron ticarətdə müşahidə edilir. 2019-cu ildə kart əməliyyatlarının 31 faizi e-ticarət üzərindən həyata keçirilirdisə, 2024-cü ildə bu göstərici 56 faizə çatıb.

Ödəniş kartları vasitəsilə ölkəxarici nağdsız ödənişlərin 54,2 faizi pərakəndə ticarət, 15,6 faizi nəqliyyat, 12,7 faizi səyahət və əyləncə, 6,7 faizi biznes xidmətləri, 2,8 faizi təhsil, 2,1 faizi bank və maliyyə xidmətləri, 5,9 faizi isə qeyd olunanlardan başqa digər ödənişləri əhatə edir. Ödəniş kartları vasitəsilə ölkədaxili nağdsız ödənişlərin 77,5 faizi bank və digər maliyyə xidmətləri, 12,7 faizi isə pərakəndə ticarət ödənişləri əhatə edir.