PROQRAMLAR

Rəqəmsal İnkişaf və Nəqliyyat Nazirliyi yanında İctimai Şuranın Elektron Təhlükəsizlik Xidməti (ETX) ilə keçirdiyi görüşdə ölkədə kibertəhlükəsizlik və məlumatların qorunması sahəsində mövcud vəziyyət və planlar müzakirə olunub.

Xeberler.az bildirir ki, görüşdə ETX rəhbərliyi görülən işlər və qarşıda duran hədəflər barədə məlumat verib, iştirakçıların sualları cavablandırılıb. Qeyd olunub ki, qurum uzun illər sektor daxilində mövqeyini formalaşdırmaqda çətinlik çəkib.

Müzakirələr zamanı informasiya təhlükəsizliyi üzrə ümumi koordinasiyanı həyata keçirən Komissiyanın strukturunda baş verən dəyişikliklərə də toxunulub. Qeyd edilib ki, rəhbərliyin hərbi modeldən mülki modelə keçməsindən sonra Komissiyanın katibliyi ETX-ə verilməyib.

Bununla yanaşı, ETX-nin qlobal sosial media platformaları ilə əlaqələrinin və kommunikasiya imkanlarının gücləndirilməsi müsbət inkişaf kimi qiymətləndirilib.

Görüş çərçivəsində bloklanan internet resursları ilə bağlı şəffaflıq, fərdi məlumatların qorunması, maarifləndirmə boşluqları, bank sektorunda artan kibercinayətlər, uşaqların onlayn təhlükəsizliyi və Milli CERT-in statusu kimi məsələlər ətrafında fikir mübadiləsi aparılıb.

Qeyd olunub ki, yaxın dövrdə fərdi məlumatların qorunması sahəsində General Data Protection Regulation standartlarına uyğun yeni qanunun qəbul edilməsi gözlənilir. Bildirilib ki, bu istiqamətdə razılaşmalar artıq başa çatmaq üzrədir və qanunun icrasına nəzarətin ETX-yə verilməsi ehtimal olunur.