MOBİL RABİTƏ

\"Azerfon\" MMC \"BakuTel 2010\" XVI Beynəlxalq telekommunikasiya və informasiya texnologiyaları sərgisi çərçivəsində kütləvi informasiya vasitələrinin nümayəndələri üçün \"3G texnologiyaları: imkanlar və üstünlüklər\" mövzusunda seminar keçirib.

\"Azerfon\" MMC-nin korporativ ünsiyyət direktoru Elşad Fərzəliyev jurnalistlərin telekommunikasiya sahəsində maariflənməsi üçün Azerfon tərəfindən keçirilən seminarları artıq ənənə halını aldığını qeyd edib. Onun sözlərinə görə, belə seminarlar jurnalistləri telekommunikasiya bazarında mövcüd xidmətlər haqqında geniş məlumat almağa və onların peşə fəaliyyətini daha müvəffəqiyyətlə davam etdirməyə imkan yaradır. Fərzəliyev qeyd edib ki, Azerfon gələcəkdə də jurnalistlər üçün seminarları davam etdirəcək.

Seminarda jurnalistləri salamyalan \"Azerfon\" MMC-nin baş direktoru Yurgen Pits Azerfon-un fəaliyyəti haqqında danışıb. Onun sözlərinə görə, Azerfon hazırda mobil rabitə bazarının 20%-ni tutmağa müvəffəq olub və 1,7 milyonadək abonentə xidmət göstərir. Bu gün Azerfon mobil rabitə şəbəkəsi Azərbaycanın 80%-ni əhatə edir. 2009-cu ildən Azerfon Azərbaycan bazarında ilk mobil operator olaraq 3G xidmətlərini göstərir. Hazırda 3G xidmətləri Azerfon-Vodafone və Nar Mobile brendləri tərəfindən Azərbaycan bazarında təqdim olunub.

Pits 2010-cü ildə Azərbaycanın mobil rabitə bazarında təqdim olunmuş 3G kamera, 3G Mobile TV, 3G USB Modem, 3G netbuk kimi texnologiyalar haqqında da danışıb.

Seminarda Azerfon-un mütəxəssisləri jurnalistlərə şirkətin bazarda təqdim etdiyi texnologiyaları nümayiş etdiriblər.

Azerfon-Vodafone-un məhsulların inkişafı üzrə meneceri Həsən Əsgərov Azerfon-Vodafone ticarət markası altında 3G texnologiyasının dəstəklədiyi məhsullar və bazarda olan xidmətlər haqqında ətraflı məlumat verib.

Nar Mobile-ın məhsulların inkişafı üzrə meneceri İlqar İbrahimli Nar Mobile abunəçiləri üçün təqdim olunmuş 3G texnologiyalı xidmətlər və avadanlıqlar haqqında jurnalistləri məlumatlandırıb.

3G Mobile TV xidməti yüksək sürətli 3G texnologiyası vasitəsilə dəstəkləyən mobil telefon istiafadəçiləri üçün bir sıra televiziya kanallarını seyr etməyə imkan yaradır.

3G+ müşahidə kamerası qeyri-adi dizayn, və üstün xarakteristikası ilə anbar, qaraj, ev, ofis, uşaq və ya ev heyvanlarını məsafədən izləməyə imkan verir. SİM-kart yerləşən 3G+ müşahidə kamerasına birbaşa videozəng etməklə müşahidə imkanlarından yararlanmaq olar.

3G USB modemi vasitəsilə Azerfon mobil şəbəkəsinin əhatə etdiyi istənilən yerdən müxtəlif internet xidmətlərindən istifadə etmək imkanları yaranıb. Genişzolaqlı mobil internet bağlantısı vasitəsilə 3G texnologiyasının mümkün servis və xidmətlərinə abunəçilər üçün birbaşa çıxış imkanları yaradılıb.

3G netbukları vasitəsilə əlavə qurğulardan istifadə etmədən və 3G texnologiyasını dəstəkləyən SİM-kartı netbukda quraşdırmaqla yüksək sürətli genişzolaqlı mobil internetə bağlantı əldə edilmək imkanları yaradılır.