MOBİL RABİTƏ

21 sentyabr 2010-cu il tarixindən etibarən Azerfon-Vodafone 3G texnologiyasına əsaslanan daha bir məhsulunu - Müşahidə Kameralarını satışa çıxardı.

İndi Azerfon-Vodafone abunəçiləri 3G Mobil Kameralarından istifadə edərək adi video-zəng vasitəsilə kameranın quraşdırıldığı ərazini istənilən an rahat şəkildə müşahidə edə bilərlər.

Azerfon-Vodafone–un Azərbaycan bazarında ilk olaraq təqdim etdiyi bu texnologiyadan istifadə qaydası olduqca sadə və rahatdır. Mobil müşahidə xidmətindən yararlanmaq üçün 3G Kameranın daxilinə quraşdırılmış sim nömrəsinə video zəng etmək kifayətdir.

Azerfon şirkətinin İdarə Heyətinin rəhbəri cənab Cüneyt Türktan Azərbaycanda 3G texnologiyasına əsaslanan xidmətlərin və məhsulların tətbiqinin əhəmiyyətini vurğulayaraq söyləmişdir: “Biz inanırıq ki, Azerfon-Vodafone-un təqdim etdiyi 3G Mobil Müşahidə Kamerası müxtəlif qurumlar, eləcə də fərdi istifadə üçün çox faydalı məhsuldur. Bu xidmətin ölkədə tətbiqi Azərbaycanın ən yeni texnologiyaları tətbiq edən ölkələr sırasına daxil olmasını bir daha sübut edir.”

3G Mobil Müşahidə Kamerası biznesin idarə olunması prosesində istifadə ilə yanaşı fərdi təhlükəsizliyi təmin edə biləcək bir xidmətdir. Belə ki, bu məhsul iş adamlarına öz ofislərini, bağ sahiblərinə bağ sahələrini, sıravi istehlakçılara öz evlərini və digər məişət obyektlərinin canlı görüntüsünü izləmək kimi müxtəlif imkanlar verir. 3G kameraya video zəng daxil olduğu zaman məsafədən asılı olmayaraq mobil telefonun düymələrindən istifadə edərək kameranın müşahidə istiqamətini dəyişmək, o cümlədən, səs ötürülməsini də həyata keçirmək mümkündür.

3G Müşahidə Kamerası akkumulyator vasitəsilə 200 saatadək işləyə bilir və video rejimdə 12 saatadək görüntünü öz yaddaşına yaza bilər. 3G Mobil Müşahidə Kamerası paketinin qiyməti 247 manat təşkil edir.

3G Müşahidə Kamerasını əldə etmək üçün Azerfon-Vodafone Mərkəzlərinə müraciət etmək kifayətdir. Kameranın texniki göstəriciləri və digər əlavə məlumatı www.azerfon-vodafone.az saytından əldə etmək olar.