STARTAP AZƏRBAYCAN

Məlum olduğu kimi, Azərbaycanda onlayn ödəmələr bazarının böyük şirkətlərindən olan GoldenPay şirkətinə məxsus Hesab.az portalı fəaliyyət göstərir.

İlk başda startap şəklində qurulmuş GoldenPay  bu gün 20-dən artıq dövlət qurumunun, 500-dən çox hüquqi və fiziki şəxsin internet üzərindən ödənişlərinin təminatçısına çevrilib.

Şirkət biznes sektoru üçün ödəmə sistemlərinin qurulması və pərakəndə sektor üçün Hesab.az portalı vasitəsilə ödənişlərin aparılması sahəsində hər il daha da uğurlu nəticələr göstərir.

Xeberler.az olaraq şirkətin yeni xidmətləri barədə mütəmadi məlumatlar yayımlayırıq.

Buna baxmayaraq bəzi mütəxəssislər hesab edir ki, Hesab.az son texnologiyalar ilə ayaqlaşa bilmir.

Onlar hesab edirlər ki, onlayn ödəmə sahəsində sürətlə inkişaf olmasına baxmayaraq Hesab.az bu yenilikləri tətbiq etmir.

Qeyd edilir ki, portalın bu günə qədər mobil tətbiqi də istifadəyə verilməyib.

Həm istifadəçilər, həm də mütəxəssislər hesab edir ki, Hesab.az son texnologiyaları tətbiq etməkdə gecikir.

Xeberler.az-ın məlumatına görə, məsələyə münasibət bildirən GoldenPay şirkətinin və Hesab.az onlayn ödəniş portalının təsisçisi və rəhbəri Fərid İsmayılzadə deyib ki, startaplar müəyyən vaxtdan sonra çevikliyini (flexibility) itirir.

Onun sözlərinə görə, platformada istifadəçi sayı artıqca artıq problemlər də çoxalır və bunlar yeni həllər tələb edir:

“Son məlumata görə, Hesab.az-da bu günə qədər 250 mindən çox adam qeydiyyatdan keçib. İstifadəçi sayı artıqca platformada edəcəyimiz dəyişikliklər daha çox məsuliyyət tələb edir. Əvvəllər əgər 1-2 istifadəçi test edəndə problemlə (bug-lar) qarşılaşırdısa, indi daha çox istifadəçi o problemlə qarşılaşa bilir. İstifadəçi sayının artması ilə qərara verəndə çox yenilik etməli olursan”.

Şirkət rəhbərinin  məlumatına görə, Hazırda Hesab.az-ın sistemində yenilənmə işləri həyata keçirilir:

“Hesab.az-a yeni texnologiyaların əlavə edilməsi ona görə uzanır ki, hazırda sistemdə böyük dəyişikliklər edilir. Məlum olduğu ki, sistem könnədir, artıq bir neçə ildir fəaliyyət göstərir. Bu gün Hesab.az-ın yenilənməsi gedir. Hesab.az-ın bazasını tamamilə yeni bazaya köçürməyə hazırlaşırıq”.

Məltəm Talıbzadə