Kabel televiziyaları ilə bağlı qaydalar hazırlanır

09-07-2009 / 12:41

Milli Televiziya və Radio Şurası (MTRŞ) kabel televiziyaları ilə bağlı qaydalar hazırlayır. Bu barədə APA-ya MTRŞ sədri Nuşirəvan Məhərrəmli bildirib. Onun sözlərinə görə, qaydalar Şuranın gələn həftə keçiriləcək iclasında qəbul olunacaq: “İndiyədək kabel televiziyaları ilə bağlı ümumi mexanizmlər olsa da, normativ sənədlər yox idi. Qəbul ediləcək qaydalar kabel televiziyalarının fəaliyyətini tənzimləyəcək”.

N. Məhərrəmlinin sözlərinə görə, hazırda Azərbaycanda 11 kabel televiziyasına lisenziya verilsə də, onlardan yalnız 5-nin fəaliyyəti hiss olunur. Qalan kabel televiziyalarının əhatə dairəsi isə çox cüzidir. Şura sədri deyib ki, “Kabel televiziyası haqqında” qanun üzərində işlər gedir, qanunun ilkin variantı hazırlanır. N. Məhərrəmlinin sözlərinə görə, Şura kabel televiziyaları üzərində nəzarəti xüsusi hallarda həyata keçirir:

“Bilirsiniz ki, kabel televiziyaları xarici kanalları ancaq retranslyasiya edir. Elə xarici kanal var ki, Azərbaycanla bağlı xüsusi siyasət həyata keçirə bilər. Gələcəkdə təbii ki, o kanalların yayımına Azərbaycanda icazə verə bilmərik. Mövcud qanunvericiliyə görə, Azərbaycanda kabel şəbəkəsi öz proqramlarını MTRŞ ilə razılaşdırmalıdır. Onlar əvvəlcədən hansı kanalları yayımlamaq istəyirlərsə, bizə məlumat verirlər. Biz həmin kanallara razılıq verəndən sonra onlar həmin kanalı yayımlayırlar”.


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.