İKT TƏHSİL

Bu gün Azərbaycan Respublikası Təhsil Nazirliyinin Sağlamlıq imkanları məhdud uşaqlar üçün 5 nömrəli xüsusi internat məktəbində Braille Teach interaktiv qurğusu təqdim olunub.

Braille Teach cihazı Bank of Baku-nun maliyyə dəstəyilə hazırlanıb və görmə məhdudiyyəti olan uşaqların Brayl əlifbasını öyrənmələrinə kömək etmək məqsədi daşıyır.

İnternat məktəbinin direktoru İradə Vəzirova bildirib ki, cihaz Sağlamlıq imkanları məhdud uşaqlar üçün 5 nömrəli respublika xüsusi internat məktəbində sınaqdan keçirilib.

Bu məqsədlə məktəbə 5 ədəd cihaz təqdim olunub.

Cihaz bir ay müddətində sınaqdan keçirilib, pedaqoji heyət tərəfindən əsasən məktəbəqədər və ibtidai siniflərdə təhsil alan gözdən əlil uşaqların şifahi nitqi və əqli inkişafı üçün əlverişli olduğu bildirilib.

İradə Vəzirova qeyd edib ki, sosial layihələrə maliyyə dəstəyi göstərən özəl sektorun dövlət qurumları ilə əməkdaşlığı təqdirəlayiqdir.

Bankın Reklam və İctimaiyyətlə Əlaqələr Departamentinin direktoru Nigar Tahirova bildirib ki, cihaz Bank of Baku-nun Korporativ Sosial Məsuliyyət proqramı çərçivəsində istehsal olunub,uşaqların Brayl əlifbasını daha asan və rahat şəkildə öyrənmələrinə, həmçinin dərslərin interaktiv təhsil metodu ilə keçirilməsinə müsbət fayda verəcək.

Azərbaycanda ilk dəfə tətbiqinə başlanılacaq bu cihaz Bionix Tech şirkətinin təsisçisi və icraçı direktoru Rəşid Əliyev tərəfindən ixtira olunub.

Rəşid Əliyev cihaz və onun istifadəsi haqqında ətraflı məlumat verib, Brayl əlifbasının öyrənilməsində uşaqlar üçün təqdim etdiyi üstünlüklərdən danışıb.

Qeyd edək ki, cihaz 4 dildə - Azərbaycan, rus, ingilis və alman dillərində istehsal olunaraq həm hərflərin, həm də rəqəmlərin öyrənilməsi üçün müxtəlif oyunlardan ibarətdir. 

Məltəm Talıbzadə