TƏHLÜKƏSİZLİK

Sağlamlıq imkanları məhdud uşaqlar üçün 3 nömrəli Respublika xüsusi internat məktəbində maarifləndirici təlim təşkil olunub. Tədbir “KOICA Azərbaycan Məzunlar Assosiasiyasının (KOAZ) təşəbbüsü, Koreya Beynəlxalq Əməkdaşlıq Agentliyinin (KOICA) dəstəyi, Rəqəmsal İnkişaf və Nəqliyyat Nazirliyinin təşkilatçılığı ilə həyata keçirilən “Uşaqlara kiberqayğı” qrant layihəsi çərçivəsində reallaşıb.

Xeberler.az bildirir ki, təlimdə “İnternetdən istifadə zamanı fərdi məlumatların mühafizəsi”, “Kibertəhlükəsizliyin əsasları”, “Rəqəmsal bacarıqların inkişafı” mövzularında təqdimatlar olub. Uşaqlara fərdi məlumatlar və onların mühafizəsi yolları, internet və sosial mediadan təhlükəsiz istifadə üsulları, internetdə qarşılaşa biləcəkləri təhlükələr və kibergigiyena qaydaları izah olunub. Həmçinin rəqəmsal bacarıqları inkişaf etdirmək yolları barədə ətraflı məlumat verilib.

Uşaqların ünvanladıqları suallar cavablandırılıb, interaktiv müzakirələr aparılıb. Sonda iştirakçılara sertifikat və müxtəlif hədiyyələr təqdim olunub.

Məlumat üçün bildirək ki, “Uşaqlara kiberqayğı” layihəsi sağlamlıq imkanları məhdud, valideynlərini itirmiş və ya valideyn himayəsindən məhrum olmuş uşaqların rəqəmsal mühitdə təhlükəsizliyini təmin etmək, onları kibertəhlükəsizlik, rəqəmsal bacarıqlar və internetdən istifadə zamanı fərdi məlumatların qorunması barədə maarifləndirmək məqsədi daşıyır.