Son zamanar TikTok sosial platforması Azərbaycanın rəqəmsal bazarına ciddi maraq göstərir. Şirkət rəsmiləri yenidən Bakıya gəlib.
Xeberler.az məlumat verir ki, TikTok-un Şərqi Avropa üzrə rəsmiləri Azərbaycanın dövlət və özəl sektoru ilə, ekspertlərlə görüşlər keçirib.
Bu sosial platforma son zamanlar Azərbaycanın rəqəmsal bazarına ciddi maraq göstərir.
TikTok rəsmi komandası ötən bir neçə gündə ölkəmizdə keçirdikləri görüşlərdə təhsil, mədəniyyət, idman və turizm, uşaqların təhlükəsizliyi və s. istiqamətlərdə müxtəlif layihələrin, Azərbaycandilli kontentin inkişafı ilə bağlı birgə işlərin icrası məsələlərini müzakirə ediblər.
Görüşdə Azərbaycan İnternet Forumunun prezidenti, ekspert Osman Gündüz də iştirak edib.
"TikTok rəsmisi ilə görüşdə Azərbaycanın rəqəmsal bazarı, ölkədə qlobal şirkətlərlə bağlı hazırlanan yeni tənzimləyici sənədlər haqqında məlumat verdim. Belə anladım ki,TikTok rəsmiləri gələcəkdə Azərbaycanda rəsmi ofisin açıla biləcəyini istisna etmir. Onlar Azərbaycanda TikTok-un gündəlik auditoriyasının 3 milyon olduğunu qeyd edirlər",- deyə ekspert görüşü şərh edib.
Xatırladaq ki, hazırda regionda yalnız Rusiya və Kazaxıstanda TikTok-un rəsmi ofisləri fəaliyyət göstərir.
