SÜNİ İNTELLEKT VƏ DATA

"Alphabet" şirkəti "Google"un süni intellekt infrastrukturunun gələcək inkişafını maliyyələşdirmək məqsədilə səhmlərin satışı hesabına 80 milyard dollar cəlb etməyi planlaşdırdığını açıqlayıb.

Xeberler.az “CNBC”ə istinadən məlumat verir ki, bu vəsait korporativ və fərdi istifadəçilər tərəfindən süni intellekt sahəsində həll və xidmətlərə rekord səviyyədə artan tələbat fonunda hesablama güclərinin genişləndirilməsi üçün lazımdır.

Saziş çərçivəsində "Berkshire Hathaway" holdinqi "Alphabet" şirkətinə 10 milyard dollar sərmayə yatıracaq. Şirkət daha 30 milyard dolları qiymətli kağızların zəmanətli yerləşdirilməsi yolu ilə cəlb etməyi planlaşdırır. Bu məbləğin 15 milyard dollarını məcburi konvertasiya olunan imtiyazlı qiymətli kağızları təmsil edən depozitar səhmlər təşkil edəcək. Qalan 40 milyard dolların isə üçüncü rübdə başlanması gözlənilən A və C sinifli səhmlərin bazarda yerləşdirilməsi proqramı vasitəsilə əldə olunması nəzərdə tutulur.

"Google" süni intellekt sahəsinə ayırdığı xərcləri artırmaqda davam edir. Şirkət apreldə 2026-cı il üzrə kapital xərcləri ilə bağlı proqnozunu əvvəlki 175–185 milyard dollardan 180–190 milyard dollara yüksəldib. Şirkətin rəhbəri Sundar Piçai həmin vaxt əsas problemlərdən birinin hesablama güclərinin çatışmazlığı olduğunu bildirib.

Analitiklərin hesablamalarına görə, "Alphabet", "Microsoft", "Meta" və "Amazon" şirkətləri bu il birlikdə kapital xərclərinə 700 milyard dollardan çox vəsait yönəldəcəklər. 2027-ci ilədək isə süni intellekt infrastrukturu sahəsinə qlobal investisiyaların həcmi 1 trilyon dolları ötə bilər.

"Alphabet" şirkətinin səhmləri son bir ildə iki dəfədən çox bahalaşaraq artım tempinə görə digər texnologiya nəhənglərini geridə qoyub. İnvestorlar şirkətin süni intellekt sahəsinə yatırımlarını və "Gemini" texnologiyalarının tətbiqinin nəticələrini müsbət qiymətləndirirlər.