TƏHLİL VƏ RƏYLƏR

Rusiya Federasiyasının Federal Antiinhisar Xidməti (FAX) mobil rabitə operator “Meqafon” ASC-nin Rusiya milli rabitə operatoru “Sinterra” şirkətinin 100 faiz səhmlərinin alınmasına dair ərizəsini qəbul edib.

Xatırladaq ki, cari ilin may ayında “Sinterra” Azərbaycanda Azərtelekom-la birgə müəssisə təsis etmişdir. Birgə müəssisənin 50 faizi “Sinterra”-ya, qalan 50 faizi isə Azərtelekom-un payına düşür. Belə vəziyyətdə “Sinterra” ilə razılaşma əldə olunduqda “Meqafon” ASC həmin BM-in tərəfdaşı olacaq.

Xeberler.az bildirir ki, bu mobil operatorun adı ölkəmizdə bir neçə dəfə qalmaqallı olaylarda hallanıb.Belə ki,cari ilin fevral ayında Azərbaycanın Azerfon mobil rabitə şirkəti (“Nar Mobile” ticarət nişanı) “Meqafon” MMC-ni məhkəməyə vermişdi.Buna səbəb isə “Meqafon” MMC istifadə etdiyi ödəmə kartları və “Prepaid” nömrələrinin müqabilində “Azerfon”a ödənilməsi nəzərdə tutulan 29 min 446 manatlıq borcun ödənməməsi idi.

2007-ci ildə isə Rusiyanın “Meqafon” mobil operatoru Dağlıq Qarabağ ermənilərinin “Karabakh Telekom” şirkəti ilə əməkdaşlıq edərək, Azərbaycanın işğal olunmuş ərazilərində beynəlxalq rouminq xidməti göstərirdi. Bu hadisə Azərbaycanda rəsmi qurumlar tərəfindən mobil operatorun separatizmə dəstəyi kimi qiymətləndirilmişdi.

Xeberler.az