TƏDBİRLƏR

Azərbaycanın AzərTelekom və Rusiyanın Sinterra şirkətlərinin təsis etdiyi C-Ring Telecom Azərbaycan-Rusiya birgə müəssisəsi və İran İslam Respublikasının ən iri milli rabitə operatoru Telecommunication Infrastructure Company-nin səhmdarı olan Iranmobin Electronics şirkəti üç ölkənin iqtisadi münasibətlərinin tarixində ilk dəfə olaraq Azərbaycan-Rusiya-İran İKT sahəsində müştərək müəssisənin yaradılması barədə elan ediblər.

Belə ki, “C-Ring Telecom” şirkətinin təsisçiləri Azərbaycanın “Azertelekom” BM və Rusiyanın “Synterra” Qapalı Səhmdar Cəmiyyətidir. “Iranmobin” isə İranın ən böyük milli rabitə operatoru olan “Electronics Development Company”nin səhmdarıdır.

BM-nin yaradılması haqda sənədlər Rusiya-İran daimi iqtisadi-ticarət komissiyasının Tehranda keçirilən işçi görüşündə komissiyanın sədrləri - RF-nin energetika naziri Sergey Şmatko və İranın xarici işlər naziri Mənuçehr Mottəkinin iştirakı ilə imzalanıb. Təsis sənədlərinə əsasən, “C-Ring Telecom” və “Iranmobin” şirkəti BM-nin səhmdar kapitalında hərəyə 50% paya malikdir.

Xəzər ətrafı dairəvi telekommunikasiya xəttinin yaradılması istiqamətində atılan addımlardan biri olan yeni müəssisə İran ərazisində həyata keçirilən layihələrdə “Iranmobin”in, “Azertelekom”un və “Synterra”nın resusrlarından və infrastrukturunun sinergiya imkanlarından istifadə edəcək. Bu dairəvi telekommunikasiya xətti Avropa və Asiya arasında trafikin tranzitini və Xəzəryanı ölkələrdə internetə magistral çıxışı təmin edəcək.

Bu layihə regionda inteqrasiyanı gücləndirməyə, beynəlxalq telekommunikasiya layihəsi çərçivəsində qlobal məsələlərin həllinə və onun bazasında birgə innovasiya proqramlarını inkişaf etdirməyə imkan yaradacaq. Əməkdaşlıq ilkin mərhələdə üç, perspektivdə isə daha bir neçə ölkənin elmi potensialını birləşdirməyə, eyni zamanda superkompüterlərə və paylanmış hesablamalar sistemi resurslarına (GRİD, Cloud Computing – “Buludlu hesablamalar”) çıxışı, informasiya təhlükəsizliyi, teletibb, distant təhsil sistemləri sahəsində layihələr həyata keçirilməsini təmin edir.