Azərbaycan Respublikası Prezidentinin “Azərbaycan Respublikasının 2025–2028-ci illər üçün Süni İntellekt Strategiyası”nın təsdiq edilməsi haqqında 19 mart 2025-ci il tarixli Sərəncamından irəli gələn hədəflərə uyğun olaraq təsis edilən “AI Azərbaycan” – Azərbaycan Süni İntellekt Olimpiadasının final mərhələsi yekunlaşıb.
Xeberler.az məlumat verir ki, Global Olympiad Center tərəfindən təsis edilən layihənin əsas məqsədi süni intellekt sahəsinə marağı olan istedadlı şagirdlərin aşkarlanması, onların data analitikası, alqoritmik düşünmə və praktiki problem həlli bacarıqlarının inkişaf etdirilməsi, həmçinin Azərbaycanın beynəlxalq yarışlarda təmsil olunacaq güclü milli komandasının formalaşdırılmasına töhfə verməkdir.
Azərbaycan-Fransız Universitetində ödənişsiz əsaslarla təşkil olunan final mərhələsində 144 şagird iştirak edib. İştirakçılar 6 saat ərzində 3 fərqli tapşırıq üzrə bilik və bacarıqlarını nümayiş etdiriblər.
Final mərhələsində iştirakçıların süni intellekt üzrə nəzəri bilikləri, data ilə işləmə, ilkin emal, kəşfedici analiz, model qurma, nəticələrin qiymətləndirilməsi, Kaggle əsaslı tətbiqi tapşırıqlar, data təmizləmə, xüsusiyyət mühəndisliyi və model performansının yaxşılaşdırılması istiqamətində bacarıqları qiymətləndirilib.
Nəticələrə əsasən, International Olympiad in Artificial Intelligence 2026 yarışında Azərbaycanı təmsil edəcək milli komandanın üzvləri müəyyənləşdirilib.
Azərbaycanı beynəlxalq final mərhələsində təmsil edəcək milli komandanın üzvləri aşağıdakılardır:
Xırdalan şəhər B.Y. Cəfərov adına 3 nömrəli məktəb-liseyin 10-cu sinif şagirdi Kənan Kərimzadə - ümumi nəticə: 93,85 bal
S.C. Pişəvəri adına Humanitar Fənlər Təmayüllü Gimnaziyanın 11-ci sinif şagirdi Şəhla Əhmədzadə - ümumi nəticə: 93,7 bal
85 nömrəli tam orta məktəbin 10-cu sinif şagirdi Tunar Əhmədzadə - ümumi nəticə: 93,35 bal
328 nömrəli tam orta məktəbin 10-cu sinif şagirdi Mirmehdi Əzizli - ümumi nəticə: 93,23 bal
Qeyd edək ki, komanda üzvləri Qazaxıstanın Astana şəhərində keçiriləcək final mərhələsində ölkəmizi təmsil etmək hüququ qazanıblar.
Bildirilib ki, bu nəticə Azərbaycanda süni intellekt sahəsində istedadlı şagirdlərin hazırlanması, onların beynəlxalq platformalara inteqrasiyası və rəqəmsal savadlılığın təşviqi baxımından mühüm əhəmiyyət daşıyır.
