İKT UŞAQLAR

Təqvim ili ərzində Bakı şəhərinin məktəbliləri riyaziyyat, informatika, kimya və proqramlaşdırma istiqamətləri üzrə bir sıra beynəlxalq olimpiada və müsabiqələrdə uğurla çıxış ediblər.

Xeberler.az bildirir ki, Qazaxıstan, Şimali Makedoniya, Birləşmiş Ərəb Əmirlikləri, Rumıniya, Özbəkistan, Boliviya, Bosniya və Herseqovinada keçirilən yarışlarda paytaxt məktəbliləri ümumilikdə 2 qızıl, 4 gümüş, 6 bürünc medal və 1 həvəsləndirici mükafata layiq görülüblər.

Bakı şəhəri 287 nömrəli “Zəkalar” liseyinin şagirdi Fərhad İsgəndər Özbəkistanın Daşkənd şəhərində keçirilən III Əl-Xarəzmi Beynəlxalq Riyaziyyat və İnformatika Olimpiadasında, eləcə də Şimali Makedoniyanın Struqa şəhərində təşkil olunan Yeniyetmələrin 29-cu Balkan Riyaziyyat Olimpiadasında (JBMO 2025) qızıl medal qazanıb. O, həmçinin Bosniya və Herseqovinanın Sarayevo şəhərində keçirilən 42-ci Balkan Riyaziyyat Olimpiadasında gümüş medala layiq görülüb.

Birləşmiş Ərəb Əmirliklərinin Dubay şəhərində təşkil olunan 57-ci Beynəlxalq Kimya Olimpiadasında (IChO 2025) Kimya-biologiya təmayüllü Respublika liseyinin XI sinif şagirdi Murad Xəlilzadə gümüş medal əldə edib. Həmin liseyin XI sinif şagirdləri Ümid Mustafazadə və Nəzrin Həsənova isə bürünc medalla təltif olunublar.

Fizika, riyaziyyat və informatika təmayüllü liseyin IX sinif şagirdi Murad Səfərli Şimali Makedoniyada keçirilən Yeniyetmələrin 29-cu Balkan Riyaziyyat Olimpiadasında bürünc medal qazanıb.

Boliviyanın paytaxtı Sukre şəhərində təşkil olunan məktəblilərin 37-ci Beynəlxalq İnformatika Olimpiadasında (IOI 2025) Zərifə Əliyeva adına liseyin XI sinif şagirdi Ayxan Dəmirli gümüş medal əldə edib. Bakı şəhəri 157 nömrəli məktəbin X sinif şagirdi Həsən Vəliyev və Fizika, riyaziyyat və informatika təmayüllü liseyin XI sinif şagirdi Elvin İmanlı bürünc medala layiq görülüb. Bakı şəhəri “Ankara məktəbi” məktəb-liseyinin XI sinif şagirdi Əli Əliyev isə həvəsləndirici mükafat qazanıb.

Bundan əlavə, Əli Əliyev Rumıniyada onlayn formatda keçirilən VII “InfO (1) Cup” proqramlaşdırma müsabiqəsində gümüş, Qazaxıstanın Astana şəhərində təşkil olunan XXI Beynəlxalq Jautikov Olimpiadasında isə bürünc medal əldə edib.

Qeyd olunan nəticələr Azərbaycan məktəblilərinin beynəlxalq bilik yarışlarında yüksək hazırlıq səviyyəsini və uğurlu təmsilçiliyini bir daha nümayiş etdirir.