Azərbaycan Respublikasının Nazirlər Kabineti bələdiyyələrin vahid informasiya sisteminə ötürüləcək və həmin sistemdən əldə ediləcək məlumatların dairəsinin təsdiq edilməsi ilə bağlı qərar qəbul edib.
Xeberler.az bildirir ki, qərar Azərbaycan Respublikası Konstitusiyasının 119-cu maddəsinin səkkizinci abzasına uyğun olaraq, “Azərbaycan Respublikasının Vergi Məcəlləsində, “Bələdiyyələrin statusu haqqında”, “Bələdiyyələrin maliyyəsinin əsasları haqqında”, “Bələdiyyə torpaqlarının idarə edilməsi haqqında”, “Yerli (bələdiyyə) vergilər və ödənişlər haqqında” və digər qanunlarda dəyişiklik edilməsi barədə 2025-ci il 24 iyun tarixli qanunun tətbiqi məqsədilə qəbul olunub.
Qərara əsasən, “Bələdiyyələrin vahid informasiya sisteminə ötürüləcək və həmin sistemdən əldə ediləcək məlumatların dairəsi” təsdiq edilir. Bu məlumatlar Elektron Hökumət İnformasiya Sistemi vasitəsilə, dövlət informasiya ehtiyatları və sistemlərinin formalaşdırılması, aparılması, inteqrasiyası və arxivləşdirilməsi qaydalarına uyğun şəkildə əldə olunacaq.
Sənədə görə, Rəqəmsal İnkişaf və Nəqliyyat Nazirliyi müvafiq dövlət orqanlarının informasiya sistemlərinin bələdiyyələrin vahid informasiya sisteminə Elektron Hökumət İnformasiya Sistemi vasitəsilə inteqrasiyasını təmin etməlidir.
Həmçinin qərarda qeyd olunur ki, sənəddə göstərilən dövlət orqanları və qurumlar fəaliyyət istiqamətlərinə uyğun olaraq bu qərardan irəli gələn digər məsələlərin həllini təmin etməlidirlər.
