E-xidmətlərdən istifadə ilə bağlı maarifləndirici tədbirlər davam edir

25-04-2016 / 22:02

“2016-2018-ci illərdə Naxçıvan Muxtar Respublikasında müasir elektron ödəniş xidmətlərinin tətbiqinin və nağdsız hesablaşmaların genişləndirilməsi üzrə Proqram”ın icrası ilə əlaqədar Mərkəzi Bankın Naxçıvan Muxtar Respublikası İdarəsi muxtar respublikada müasir elektron xidmətlərin təklif olunması ilə bərabər, maarifləndirilmə və institusional mühitin yaradılması məsələlərinə də ciddi diqqət yetirir.

Xeberler.az məlumat verir ki,  Mərkəzi Bankın Naxçıvan Muxtar Respublikası İdarəsinin təşkilatçılığı ilə “Elektron ödəniş sahəsində inkişaf istiqamətləri” adlı seminarda çıxış edən idarənin sədr müavini Elvin Axundov bu barədə danışıb.

Bildirilib ki, elektron ödəniş xidmətlərinin tətbiqinin kütləviləşdirilməsi bir sıra məsələlərin həllinə şərait yaradır. Bunların arasında ödənişlərin toplanılmasında hesabatlılığın və şəffaflığın yüksək səviyyədə təmin edilməsi, vergidənyayınma hallarının aradan qaldırılması ilə dövlət müəssisə və təşkilatları tərəfindən pul vəsaitlərinin səmərəli istifadə olunması, təsərrüfat subyektlərində maliyyə intizamının gücləndirilməsi xüsusi yer tutur.

Vurğulanıb ki, Mərkəzi Bankın Naxçıvan Muxtar Respublikası İdarəsinin əməkdaşları aidiyyəti dövlət qurumlarının nümayəndələri ilə birlikdə muxtar respublikanın şəhər və rayonlarında əhali arasında maarifləndirici tədbirlərin, orta, orta ixtisas və ali təhsil müəssisələrində nağdsız ödəniş vərdişlərinin inkişaf etdirilməsinə yönələn xüsusi məşğələlərin və seminar-treninqlərin təşkilini davam etdirirlər.

Sonra “2013-2015-ci illərdə Naxçıvan Muxtar Respublikasında elektron ödəniş məkanının formalaşdırılması və nağdsız ödənişlərin həcminin artırılması üzrə Tədbirlər Planı” çərçivəsində görülmüş işlərlə bağlı Mərkəzi Bankın Naxçıvan Muxtar Respublikası İdarəsinin İqtisadi təhlil və statistika şöbəsinin mütəxəssisi Hafiz İsmayılbəylinin, “2016-2018-ci illərdə Naxçıvan Muxtar Respublikasında müasir elektron ödəniş xidmətlərinin tətbiqinin və nağdsız hesablaşmaların genişləndirilməsi üzrə Proqram”da nəzərdə tutulmuş tədbirlərlə bağlı həmin şöbənin aparıcı mütəxəssisi Tural Şirəlizadənin çıxışları olub.

Sonda tədbir iştirakçılarını maraqlandıran suallar ətrafında müzakirələr aparılıb.

Tədbirdə muxtar respublikada fəaliyyət göstərən bankların nümayəndələri ilə yanaşı, Naxçıvan Dövlət Universitetində təhsil alan magistrantlar, “Naxçıvan” Universitetinin bakalavrları və Mərkəzi Bankın Naxçıvan Muxtar Respublikası İdarəsi tərəfindən hamiliyə götürülmüş Naxçıvan Dövlət Texniki Kollecinin Bank işi ixtisası üzrə təhsil alan tələbələr iştirak ediblər.

Xeberler.az

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.