Moldovanın paytaxtı Kişinyov şəhərində Yeniyetmələrin Avropa İnformatika Olimpiadası (EJOI 2024) keçirilib.
Məktəblilər beynəlxalq olimpiadada bir gümüş və iki bürünc medal qazanıblar.
Qeyd edək ki, olimpiadada Bakı şəhəri 157 nömrəli tam orta məktəbin şagirdi Həsən Vəliyev gümüş, Bakı Türk Anadolu liseyinin şagirdi Əhməd Qənbərli və Sumqayıt şəhəri 23 nömrəli tam orta məktəbin şagirdi Muhammedali Əhmədov isə bürünc medal qazanıblar.
Xeberler.az bildirir ki, məsələyə Azərbaycan İnternet Formunun Prezidenti, ekspert Osman Gündüz münasibət bildirib.
"Məhz İnformatika üzrə belə uğurlu nəticə əldə etmək böyük nailiyyətdir. Məktəblilərimizi, məktəb rəhbərlərini, müəllimlərini və repetitorlarını, valideynlərini, olimpiadaya hazırlıq üzrə komandanı təbrik edirəm. Beynəlxalq olimpiadalara hazırlıq prosesinə sponsorluq edən Azercell şirkətinə də təşəkkürlər".
Ekspert qeyd edib ki, nə üçün nüfuzlu beynəlxalq fənn olimpiadalarında ağır intellektual zəhmət hesabına uğur qazananlarımız dövlət tərəfindən təltif olunmur və onlara da böyük məbləğdə pul mükafatları verilmir?
"Yeri gəlmişkən, beynəlxalq idman yarışlarında, idman Olimpiadalarda qalib gələnlərə, ölkəmizin adını ucaldanlara dövlət tərəfindən doğru olaraq yüksək mükafatlar verilir.
Amma nəzərə almaq lazımdır ki, riyaziyyat, informatika, fizika və s. fənlər üzrə beynəlxalq olimpiadalarda yüksək nəticə əldə etmək də hər oğulun işi deyil. Dünyanın nəhəng şirkətləri və tanınmış universitetləri elə olimpiadalar başa çatmamış azacıq uğur qazananları ələ keçirməyə çalışırlar".
Osman Gündüz təklif edib ki, beynəlxalq fənn olimpiadalarında qalib gələnlərə də dövlət tərəfindən eyni münasibət sərgilənsin. Uğur qazananlar, onların müəllimləri və hətta repetitorları, aid olduğu məktəb rəhbərləri də mükafatlandırılsın:
"Diqqətlə yanaşsaq görərik ki, İNFORMATİKA üzrə beynəlxalq bir olimpiadada Həsənin qazandığı gümüş, Əhməd və Məhəmmədəlinin qazandığı bürünc ölkəmiz üçün bir az öncə başa çatmış Yay Olimpiya oyunlarında qazanılan uğurlarımızdan az əhəmiyyət kəsb etmir.
Təsəvvür edin ki, biz 30 ildir beynəlxalq riyaziyyat olimpiadasında iştirak edirik, amma qızıl medal ala bilməmişik.
Əlbəttə, asan olsaydı çoxdan əldə edərdik. Beynəlxalq fənn olimpiadalarında iştirakı stimullaşdırmaq faydalı olardı. Beynəlxalq fənn olimpiadalarında qızıl, gümüş və bürünc medal qazananlar da təltif olunmalı, onlara və müəllimlərinə böyük məbləğdə pul mükafatları verilməlidir ."
