KRİPTO VƏ BLOCKCHAİN

Məlumat verdiyimiz kimi, Facebook şirkəti sosial şəbəkədə kriptovalyuta bazarının reklamı barədə qadağa tətbiq edib.

Belə ki, şirkət bu sahədə fırıldaqçılığın qarşısını almaq üçün Facebook və Instagram-da gedən çox saylı İCO və birjaların reklamlarını qadağan edib.

Məsələni saytımıza şərh edən kriptovalyuta üzrə araşdırmaçı Orxan Əhmədov deyib ki, bu reklamlarının əksəriyyətinin əsas məğzində pul dayanır. Belə ki, belə reklamlardan iki günə 15-30 faiz qazanmaq mümkündür:

“Bu metoddan daha çox birjalar istifadə edirdilər. Facebook da düşündü ki, bu reklamlardan keçərək, birjalara pul yatıran insanlar böyük məbləğlərdə pul itirə bilər. Çox güman ki, bu tip reklamların ləğvinə qərarın qəbulu, həm də istifadəçilərin şikayətləri əsasında formalaşıb”.

Onun sözlərinə görə, İCO-lar ilə bağlı məsələ daha qəlizdir. Belə ki, çox sayda SCAM layihələr özlərini sosial şəbəkələr vasitəsilə reklam edərək, pullar toplayır və daha sonra yoxa çıxır:

“Ən sonu isə Prodeum.io layihəsi idi ki, İCO bitdikdən sonra saytı bağlayaraq yoxa çıxıb. Layihə 20 yanvar-13 mart tarixləri arasında İCO keçirərək 6 milyon dollar vəsait toplamaq istəyirdi. Lakin 18 faizini topladıqdan sonra yoxa çıxdı. Bununla da bir daha insanlar aldadıldı. Ona görə də bu növ yatırım cəlbinə qarşı mənfi rəy formalaşıb”.

Orxan Əhmədov deyib ki, məhz bu cür saytlara keçidlərin qarşısını almaq üçün Facebook İCO və kriptovalyuta birjalarının reklamlarının qarşısını alıb. O, bu addımı dəstəklədiyini vurğulayıb.

Məltəm Talıbzadə