AZNET

Məlumat verdiyimiz kimi, hazırda Azərbaycan Sahibkarlar Konfederasiyasının İKT Komissiyasının 2-ci toplantısı keçirilir.

Qeyd edək ki, bu Komissiya artıq ölkəmizdə İKT sahəsində işgüzar dairələrin, dövlət qurumlarının, həmçinin informasiya cəmiyyətinin bir araya gəldiyi ən aparıcı platformaya çevrilməkdədir. 

Xeberler.az-ın məlumatına görə, toplantıda Komissiyanın iş prinsipləri, fəaliyyət istiqamətləri ətrafında müzakirələr aparacaq, əsasnaməsi təsdiq ediləcək.

Həmçinin iclas çərçivəsində müvafiq dövlət qurumlarının təmsilçiləri bu sahədə görülən işlər barədə məlumat verilir.

Tədbir çərçivəsində Azərbaycan İKT Sənayesinin Strateji İnkişaf Planı sənədi (hələlik ilkin konseptual mərhələdir), İKT həllərinin və məhsullarının xarici bazarlara ixracının təşviqi, elektron ticarət, qanunvericiliyinin vəziyyəti və əqli mülkiyyət məsələləri ətrafında da fikir mübadiləsi aparılacaq, təkliflər veriləcək və fəaliyyət planı hazırlanacaq. 

 İclas zamanı müzakirəyə çıxarılan məsələlərdən biri də İKT sahəsində Milli Assosiasiyanın yaradılması olacaq. Bu Assosiasiyanın yaradılmasının əhəmiyyəti vurğulanacaq və Komissiya üzvlərinin məqsədəuyğun hesab edəcəyi təqdirdə, onun yaradılması barədə qərar veriləcək. 

İclasda müzakirə ediləcək təkliflər sonradan əsaslandırılmış formada Prezident yanında İqtisadi İslahatların Təhlili və Kommunikasiya Mərkəzinə təqdim olunacaq.

Tədbirdə bir sıra İKT qurum və şirkətlərin nümayəndələri iştirak edir. 

Məltəm Talıbzadə