AZNET

Dünyada ilk mobil mesajın göndərilməsindən 23 il keçir.

Xeberler.az bildirir ki, SMS-in yaranma tarixi Danimarkadakı pizzaxanada başlayıb.

1984-cü ildə Danimarkanın Kopenhagen şəhərində keçirilən mobil rabitə üzrə konfransda iştirak edən finlandiyalı mühəndis Matti Makkonen iki həmkarı ilə pizzaxanada keçirilmiş qeyri-rəsmi görüşdə GSM mobil rabitə şəbəkələri üzrə qısa mesajlarla mübadilə sisteminin ideyası ilə bağlı müzakirə aparıblar. O dövrdə GSM yalnız Skandinaviya ölkələrində tətbiq olunub və bir neçə il sonra ümumavropa standartı kimi təsdiqlənib.

1992-ci ildə SMS standartı təsdiqlənib və Böyük Britaniyanın Vodafone şirkəti Sema Group standartlaşdırma təşkilatından SMS mərkəz üçün proqram təminatının hazırlanmasını sifariş edib. Tərtibatçılar komandasının iştirakçılarından biri Nil Papvort olub.

Proqram təminatının hazırlanmasına təxminən 1 il vaxt sərf olunub. 1992-ci il dekabrın 3-də Nil Papvort Vodafone şirkətinin mənzil-qərargahına gedərək orada kompüter arxasında əyləşdikdən sonra SMS vasitəsilə Vodafone şirkətinin direktoru Riçard Carvisə Merry Christmas mesajını göndərib. SMS dövrünün tarixi belə başlanıb.

GSM Association-ın məlumatına əsasən, indi dünyada 1 ildə təxminən 7 trilyon SMS mesaj göndərilir ki, bu da  saniyədə təxminən 200 min SMS deməkdir.

Xeberler.az