TƏHLİL VƏ RƏYLƏR

Daxili İşlər Nazirliyinin Kibercinayətkarlıqla Mübarizə Baş İdarəsinin Ukrayna polisi ilə birgə keçirdiyi əməliyyat ekspertlər tərəfindən yüksək qiymətləndirilir. Əməliyyat nəticəsində Azərbaycan vətəndaşlarını hədəfə alan və Ukraynada yerləşən beynəlxalq kiberdələduzluq şəbəkəsi ifşa edilib. Təşkilatçılar da daxil olmaqla 11 nəfər saxlanılaraq Azərbaycana gətirilib.

Xeberler.az bildirir ki, Azərbaycan İnternet Forumunun Prezidenti, ekspert Osman Gündüz sosial şəbəkədəki paylaşımında əməliyyatın texniki-texnoloji və təşkilati məqamlarına diqqət çəkib. Onun sözlərinə görə, burada ayrı-ayrı kiberdələduzların yox, fiziki olaraq xaricdə yerləşən mütəşəkkil kiber şəbəkənin ifşasından söhbət gedir.

O. Gündüz hesab edir ki, şəbəkənin xaricdəki təşkilatçılarına qədər gedib çıxmaq uzunmüddətli və mürəkkəb texniki-texnoloji, əməliyyat-axtarış və analitik iş tələb edib. Ekspertin fikrincə, bu prosesdə beynəlxalq zənglərin və rəqəmsal izlərin təhlili, bank kartları üzrə maliyyə əməliyyatlarının izlənilməsi, Telegram üzərindən əlaqələrin araşdırılması, pulların kriptovalyutaya çevrilməsinin müəyyənləşdirilməsi kimi işlər aparılıb.

Ekspert qeyd edib ki, DİN əməliyyatda istifadə olunan konkret texnoloji və analitik mexanizmləri açıqlamayıb. Lakin nəticələr ciddi araşdırma, ölkədaxili və xarici koordinasiya aparıldığını düşünməyə əsas verir. O, prosesdə banklar, mobil operatorlar və təhlükəsizlik qurumlarının da iştirak etdiyini ehtimal edir.

O. Gündüz xatırladıb ki, Ukrayna uzun illərdir müxtəlif ölkələrin vətəndaşlarını hədəfə alan saxta “Call Center”lərin fəaliyyət göstərdiyi məkanlardan biri kimi tanınır. Müharibə şəraitində xarici hüquq-mühafizə orqanları ilə birgə əməliyyatın təşkili və şəbəkə təşkilatçılarının saxlanılması isə xüsusi əhəmiyyət daşıyır.

Ekspert əməliyyatı Kibercinayətkarlıqla Mübarizə Baş İdarəsinin peşəkar potensialını, beynəlxalq əməkdaşlıq imkanlarını və transsərhəd kibercinayətkarlığa qarşı mübarizə qabiliyyətini göstərən ciddi uğur kimi dəyərləndirib. O, əməliyyatın hazırlanmasında və həyata keçirilməsində iştirak edən kiber mütəxəssisləri və analitikləri təbrik edib.

O. Gündüzün fikrincə, bu cür əməliyyatlar onu da göstərir ki, kibercinayətkarlıqla effektiv mübarizədə yalnız ənənəvi metodlar artıq yetərli deyil. Bunun üçün güclü İT infrastrukturu, rəqəmsal kriminalistika və analitika, eləcə də beynəlxalq əməkdaşlıq vacib şərtdir.