TENDER

İlon Mask özünün Kanada vətəndaşlığından məhrum edilməsi ilə bağlı petisiyaya cavab olaraq bu ölkəni saxta dövlət adlandırıb.

Xeberler.az məlumat verir ki, ABŞ Administrasiyasının Hökumətin səmərəliliyi departamentinin rəhbəri, sahibkar İlon Mask Kanadanın əsil ölkə olmadığını bəyan edərək özünün bu ölkənin vətəndaşlığından məhrum edilməsini tələb edən petisiyanı imzalayan minlərlə kanadalıya cavab verib.

Ötən gün İlon Maskın Kanada vətəndaşlığından məhrum edilməsini tələb edən onlayn petisiya 160 min imza toplayıb. Eyni zamanda, 15 mindən çox kanadalı ABŞ Prezidenti Donald Trampın persona non-qrata elan edilməsi tələbi ilə çıxış edib.

Petisiyada qeyd olunur ki, 1989-cu ildə Kanada vətəndaşı olan İlon Mask ölkənin maraqlarına zidd hərəkətlərə yol verib, ölkədəki seçkilərə müdaxilə edib və onun suverenliyinə “xələl gətirməyə çalışan” xarici hökumətin üzvü olub.

Qeyd edək ki, bir müddət öncə Birləşmiş Ştatların Kanada mallarına rüsum tətbiq etməsi ilə bağlı fikir ayrılıqları fonunda Donald Tramp bu ölkənin Baş naziri Castin Trüdonu “böyük Kanada ştatının qubernatoru” adlandırmışdı. Donald Tramp administrasiyasında Hökumətin səmərəliliyi departamentinə rəhbərlik edən İlon Mask isə Kanadanın hökumət başçısını “qız” adlandıraraq vəzifəsini tərk etmək ərəfəsində olduğu üçün onun ABŞ-a birləşmənin qeyri-mümkünlüyü ilə bağlı sözlərinin çəkisinin olmadığını demişdi.