PROQRAMLAR

Amerikalı milyarder İlon Mask sərvəti 800 milyard dollardan çox olan ilk biznesmen kimi tarixə düşüb.

Xeberler.az “Forbes Real-Time Billionaires” nəşrinə istinadən məlumat verir ki, Maskın sərvəti “SpaceX” və “xAI” şirkətlərinin birləşməsindən sonra artıb və bu konqlomeratın dəyəri 1,25 trilyon dollar məbləğində qiymətləndirilib. “Forbes”in məlumatına görə, İlon Mask dünyanın ilk trilyonçusu olmaq hədəfindən o qədər də uzaqda deyil.

Birləşmədən əvvəl Mask “SpaceX”in təxminən 42 faizinə və “xAI”nin 49 faizinə sahib idi. Dekabr ayında “SpaceX” işçilərdən və ilk investorlardan şirkətin təxminən 800 milyard dollar dəyərində satın alınması təklifini elan edib. Bu qiymətləndirməyə əsasən, Maskın “SpaceX”-də payı təxminən 336 milyard dollar dəyərində olub. Yanvar ayında “xAI” maliyyələşdirməni 230 milyard dollar dəyərində qiymətləndirib. Bu qiymətləndirməyə əsasən, “Forbes” Maskın startapdakı payını təxminən 122 milyard dollar dəyərində qiymətləndirir.

Mask son dörd ayda artıq dörd yeni sərvət rekordu qırıb. Belə ki, oktyabr ayında ABŞ Hökumət Səmərəliliyi Departamentindən (DOGE) ayrılandan və “Tesla”nın səhmləri kəskin şəkildə yüksəldikdən sonra o, dünyada 500 milyard dollarlıq xalis sərvətə malik ilk şəxs olub. Dekabr ayında “SpaceX”in dəyərindəki artım fonunda Maskın xalis sərvəti 600 milyard dolları keçib. Bir neçə gün sonra Delaver Ali Məhkəməsinin Maskın “Tesla”ya aid səhm opsionlarını bərpa etməsinin ardından bu sərvət 700 milyard dollara çatıb. 2024-cü ildə aşağı məhkəmə instansiyası bu opsionları ləğv etmişdi.