SOSİAL MEDIA

“Tesla” və “SpaceX” şirkətlərinin sahibi İlon Mask “Tesla” səhmlərinin 15,4 faiz ucuzlaşması nəticəsində bir gündə 29 milyard dollar itirib.

Xeberler.az məlumat verir ki, bu rəqəmlər “Bloomberg” Milyarderlər İndeksində yer alıb.

Bazar ertəsi günü keçirilən ticarətin sonunda elektrikli avtomobil istehsalçısı “Tesla”nın səhmləri 15,43 faiz ucuzlaşaraq 222,15 dollara düşüb. Eyni zamanda, ilin əvvəlindən səhmlər artıq 1,8 dəfə ucuzlaşıb. Halbuki 2024-cü ildə bir səhmin qiyməti 403,84 dollar idi.

Martın 10-da ABŞ bazarlarında satışların gerilədiyi, eləcə də avtomobil istehsalçısının səhmlərinin daxil olduğu “Nasdaq Composite” texnoloji indeksinin 4 faiz ucuzlaşması müşahidə olunub. Bundan başqa, UBS analitiki bir “Tesla” səhminin hədəf qiymətini 259 dollardan 225 dollara endirib.

Nəticədə Maskın sərvəti bir gündə 29 milyard dollar azalaraq 301 milyard dollara düşüb. “Bloomberg” reytinqlərinə görə, ilin əvvəlindən milyarder sərvətinin 30,5 faizini və ya 132 milyard dollarını itirib. Maskın xalis sərvəti ötən ilin dekabrında 486 milyard dollar təşkil edərək zirvəyə çatmışdı.

Bütün bunlara baxmayaraq, amerikalı sahibkar dünyanın ən zəngin adamları arasında liderliyini qoruyub saxlayır. Siyahıda ikinci yerdə “Amazon”un qurucusu Ceff Bezos (216 milyard dollar), üçüncü yerdə isə Mark Zukerberq (211 milyard dollar) qərarlaşıb.