Kompüter oyunları tarixi muzeyi açılacaq
Avropanın ən iri kompüter oyunlarının tarixi muzeyi Almaniyanın paytaxtı Berlində açılacaq. Bu barədə muzeyin “Computerspielemuseum” adlı saytında xəbər verilib. Belə ki, muzey şərqi Berlində keçmiş “Varşava” kafesinin binasında açılacaq. Muzey 670 kvadrat metr ərazini əhatə edəcək. Burada 16 mindən çox oyun, 2,3 min kompüter və oyun konsolları, həmçinin 10 min tematik nəşri əhatə edən kitabxana var.
Xatırladaq ki, muzey uzunmüddətli fasilədən sonra yenidən açılır. 1997-ci ildən 2000-ci ilə kimi Berlində kompüter oyunlarının tarixindən bəhs edən sərgi artıq olub. Muzeyin nümayəndəsi Andreas Lanqenin sözlərinə görə, həmin vaxt onlar ərazinin kiçik olmasına görə, muzeyi bağlamaq məcburiyyətində qalıb.
Qeyd edək ki, yeni sərgi kompüter oyunlarının 50 illik tarixindən bəhs edəcək, eksponatlar bu sənayenin tarixi inkişafından iştirakçıların təsəvvürünü yaradacaq. Bundan başqa, sərgi iştirakçıları nadir oyunları da oynaya biləcək. Bunu üçün onlara 21 eksponat təqdim edilib.
